ആ ചരിത്ര നേട്ടത്തിൽ അജയന്റെ രണ്ടാം മോഷണവും; കേരളത്തിൽ നിന്ന് മാത്രം 50 കോടി

കേരളത്തിൽ നിന്ന് മാത്രം 50 കോടി രൂപ ഗ്രോസ് കളക്ഷൻ നേടുന്ന ചിത്രങ്ങളിൽ ഒന്നായി ടോവിനോ തോമസിന്റെ അജയന്റെ രണ്ടാം മോഷണം. റിലീസ് ചെയ്ത് 18 ദിവസം കൊണ്ടാണ് ചിത്രം ഈ നേട്ടത്തിലേക്ക് എത്തിയത്. ആഗോള തലത്തിൽ നൂറ് കോടി ഗ്രോസിലേക്കു കുതിക്കുന്ന ഈ ചിത്രം ടോവിനോ തോമസിന്റെ കരിയറിലെ തന്നെ ഏറ്റവും വലിയ സോളോ ഹിറ്റ് ആണ്.

ഇതിനു മുൻപ് 12 ചിത്രങ്ങളാണ് കേരളത്തിൽ നിന്ന് മാത്രം 50 കോടി രൂപ ഗ്രോസ് നേടിയത്. പുലി മുരുകൻ (86 കോടി), ബാഹുബലി 2 (75 കോടി), ലൂസിഫർ (66 കോടി), കെ ജി എഫ് 2 (67 കോടി), 2018 (89 കോടി), ജയിലർ (58 കോടി), ആർഡിഎക്സ് (52 കോടി), ലിയോ (60 കോടി), പ്രേമലു (62 കോടി), മഞ്ഞുമേൽ ബോയ്സ് (72 കോടി), ആട് ജീവിതം (79 കോടി), ആവേശം ( 76 കോടി) എന്നിവയാണ് ആ 12 ചിത്രങ്ങൾ.

ഈ നേട്ടം കൈവരിക്കുന്ന ഒൻപതാമത്തെ മാത്രം മലയാള ചിത്രം കൂടിയാണ് അജയന്റെ രണ്ടാം മോഷണം. സുജിത് നമ്പ്യാർ രചിച്ച് നവാഗതനായ ജിതിൻ ലാൽ സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ്. മൂന്നു കാലഘട്ടങ്ങളിലൂടെ കഥ പറയുന്ന ഒരു ത്രീഡി ഫാന്റസി ആക്ഷൻ ചിത്രമായാണ് അജയന്റെ രണ്ടാം മോഷണം ഒരുക്കിയിരിക്കുന്നത്