ടൊവിനോ ചിത്രം ‘മായാനദി’ യുടെ പുതിയ പോസ്റ്റർ പുറത്ത്

ടൊവിനോ തോമസിന്റെ പുതിയ ചിത്രമായ ‘മായാനദി’യുടെ പുതിയ പോസ്റ്റർ പുറത്ത്. റാണി പദ്മിനിക്ക് ശേഷം ആഷിക് അബു സംവിധാനം ചെയ്യുന്ന ചിത്രമാണ് ‘മായാനദി’. ‘ഞണ്ടുകളുടെ നാട്ടിൽ ഒരിടവേള’യിലൂടെ ശ്രദ്ധേയായ ഐശ്വര്യ ലക്ഷ്‌മിയാണ് ചിത്രത്തിലെ നായിക. ആഷിക് അബു തന്നെയാണ് ചിത്രത്തിന്റെ പോസ്റ്റർ തന്റെ ഒഫിഷ്യൽ ഫേസ്ബുക്ക് അക്കൗണ്ടിലൂടെ പുറത്ത് വിട്ടത്. ടൊവിനോയും ഐശ്വര്യ ലക്ഷ്മിയും പ്രണയഭരിതരായി ചേർന്ന് നിൽക്കുന്ന രീതിയിലുള്ളതാണ് പുതിയ പോസ്റ്ററും. ചിത്രത്തിന്റെ ഫസ്റ്റ്ലുക്ക് പോസ്റ്റർ അണിയറപ്രവർത്തകർ കഴിഞ്ഞ ദിവസം പുറത്ത് വിട്ടിരുന്നു.

അമല്‍ നീരദിന്റെ കഥയ്ക്ക് ശ്യാം പുഷ്‌കരനും ദിലീഷ് നായരും ചേര്‍ന്നാണ് തിരക്കഥ. സോള്‍ട്ട് ആന്‍ഡ് പെപ്പര്‍, ഡാ തടിയാ, ഇടുക്കി ഗോള്‍ഡ് എന്നീ സിനിമകള്‍ക്ക് ശേഷം ശ്യാമും ദിലീഷും ഒരുമിച്ച് രചന നിര്‍വഹിക്കുന്ന ആഷിക് അബു ചിത്രം എന്ന പ്രത്യേകത ‘മായാനദി’ക്കുണ്ട്. റെക്സ് വിജയന്റേതാണ് സംഗീതം. ഛായാഗ്രഹണം ജയേഷ് മോഹൻ, വസ്ത്രാലങ്കാരം സമീറ സനീഷ് എന്നിവർ നിർവഹിക്കും. ആഷിഖ് അബുവും സന്തോഷ് ടി കുരുവിളയും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രം ക്രിസ്‌തുമസ്‌ റിലീസായി തിയറ്ററുകളിലെത്തും.

അതേസമയം ടൊവിനോ അഭിനയിക്കുന്ന ‘അഭിയുടെ കഥ അനുവിന്റെയും; എന്ന സിനിമയാണ് അടുത്തതായി അണിയറയിൽ ഒരുങ്ങുന്നത്. യാത്രയ്ക്ക് പ്രാധാന്യം നൽകിയാണ് പുതിയ ചിത്രമെന്നാണ് സൂചന. കൂടാതെ ആഗസ്റ്റ് സിനിമ നിര്‍മ്മിക്കുന്ന നവാഗതനായ ഫെലിനി സംവിധാനം ചെയ്യാന്‍ പോവുന്ന തീവണ്ടി എന്ന ചിത്രത്തിലെ നായകനും ടൊവിനോ ആണെന്നാണ് വാര്‍ത്തകള്‍. സെക്കന്‍ഡ് ഷോ, കൂതറ എന്നീ സിനിമകള്‍ക്ക് തിരക്കഥയൊരുക്കിയ വിനി വിശ്വ ലാല്‍ ആണ് തീവണ്ടിയ്ക്കും തിരക്കഥ എഴുതിയിരിക്കുന്നത്. തമിഴ് നടന്‍ ധനുഷിന്റെ മാരി എന്ന സിനിമയുടെ രണ്ടാം ഭാഗത്തില്‍ വില്ലൻ വേഷത്തിലും ടൊവിനോ എത്തുന്നുണ്ട്.