തല്ലുമാലക്ക് ശേഷം വീണ്ടും ഉഗ്രൻ അടിയുമായി ടോവിനോ; കളരിപ്പയറ്റുമായി അജയന്റെ രണ്ടാം മോഷണം

ഈ വർഷം റിലീസ് ചെയ്ത മലയാള ചിത്രങ്ങളിലെ ഏറ്റവും വലിയ വിജങ്ങളിലൊന്നാണ് ടോവിനോ തോമസ് നായകനായി എത്തിയ തല്ലുമാല. അനുരാഗ കരിക്കിൻ വെള്ളം, ഉണ്ട എന്നിവക്ക് ശേഷം ഖാലിദ് റഹ്മാൻ ഒരുക്കിയ ഈ ചിത്രത്തിൽ കല്യാണി പ്രിയദർശനാണ് നായികാ വേഷം ചെയ്തത്. മുഹ്സിന്‍ പരാരിയും അഷ്‌റഫ്‌ ഹംസയും ചേര്‍ന്ന് രചന നിർവഹിച്ച ഈ ചിത്രത്തിന്റെ ഹൈലൈറ്റ് ഇതിലെ കിടിലൻ സംഘട്ടന രംഗങ്ങളായിരുന്നു. കിടിലൻ ഫൈറ്റ് സീനുകൾ നിറഞ്ഞ ഈ ചിത്രം യുവ പ്രേക്ഷകർ ഇരു കയ്യും നീട്ടിയാണ് സ്വീകരിച്ചത്. ഇപ്പോഴിതാ തല്ലുമാലക്ക് ശേഷം വീണ്ടും കിടിലൻ ആക്ഷൻ രംഗങ്ങൾ നിറഞ്ഞ ഒരു ചിത്രവുമായി എത്തുകയാണ് ടോവിനോ തോമസ്. അജയന്റെ രണ്ടാം മോഷണം എന്ന് പേരിട്ടിരിക്കുന്ന ഈ ചിത്രത്തിന്റെ ഷൂട്ടിംഗ് അടുത്ത മാസമാണ് ആരംഭിക്കുന്നത്. ഇതിൽ എട്ട് കിടിലൻ ആക്ഷൻ സീനുകളാണ് ഒരുക്കാൻ പോകുന്നത്. ഈ ചിത്രത്തിന് വേണ്ടി കളരിപ്പയറ്റ് പഠിക്കുന്നതിന്റെ തിരക്കിലാണ് ഇപ്പോൾ ടോവിനോ തോമസ്.

ഈ ചിത്രത്തിൽ മൂന്നു വേഷങ്ങൾ ചെയ്ത് കൊണ്ടാണ് ടോവിനോ എത്തുന്നതെന്നതാണ് ഇതിന്റെ ഹൈലൈറ്റ്. നവാഗതനായ ജിതിന്‍ ലാല്‍ സംവിധാനം ചെയ്യാൻ പോകുന്ന ഈ ചിത്രത്തിൽ 1900, 1950, 1990 കാലഘട്ടങ്ങളിലുള്ള മൂന്ന് കഥാപാത്രങ്ങളെയാണ് ടോവിനോ തോമസ് അവതരിപ്പിക്കുക. മണിയന്‍, അജയന്‍, കുഞ്ഞിക്കേളു എന്നിങ്ങനെയാണ് ടോവിനോ തോമസ് അവതരിപ്പിക്കാൻ പോകുന്ന കഥാപാത്രങ്ങളുടെ പേരുകൾ. യുജിഎം എന്റര്‍ടെയ്ന്‍മെന്റ് നിര്‍മ്മിക്കുന്ന ഈ ചിത്രത്തിന്റെ തിരക്കഥ രചിക്കുന്നത് സുജിത്ത് നമ്പ്യാരാണ്. തെന്നിന്ത്യന്‍ നടി കൃതി ഷെട്ടി നായികാ വേഷത്തിലെത്തുമെന്നു കരുതപ്പെടുന്ന ഈ ചിത്രം വടക്കൻ കേരളത്തിലാണ് ഷൂട്ട് ചെയ്യുന്നത്. തമിഴില്‍ നിന്നുള്ള സംഗീത സംവിധായകന്‍ ദിപു നൈനാന്‍ തോമസ് സംഗീതമൊരുക്കുന്ന ഈ ചിത്രം എഡിറ്റ് ചെയ്യുന്നത് ക്രിസ്റ്റി സെബാസ്റ്റ്യന്‍ ആണ്.