ഈ വാദത്തിൽ ആര് ജയിക്കും? ജയിക്കാനുള്ള വാശിയോടെ ടോവിനോയും കീർത്തിയും.

മലയാളത്തിന്റെ യുവ താരം ടോവിനോ തോമസ് നായകനും ദേശീയ അവാർഡ് നേടിയ മലയാളി നായിക കീർത്തി സുരേഷ് നായികാ വേഷവും ചെയ്യുന്ന ഏറ്റവും പുതിയ ചിത്രമാണ് വാശി. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് സംഗീത മാന്ത്രികൻ എ ആർ റഹ്മാൻ, തെന്നിന്ത്യൻ സൂപ്പർ നായിക സാമന്ത എന്നിവർ ചേർന്ന് റിലീസ് ചെയ്തു. ടോവിനോ തോമസും കീർത്തി സുരേഷും വക്കീൽ കഥാപാത്രങ്ങളെ ആണ് അവതരിപ്പിക്കുന്നതു എന്ന സൂചനയാണ് ഈ ഫസ്റ്റ് ലുക്ക് പോസ്റ്റർ നമ്മുക്ക് നൽകുന്നത്. അത്കൊണ്ട് തന്നെ ഈ ചിത്രം ഒരു കോർട്ട് റൂം ഡ്രാമയോ ലീഗൽ ത്രില്ലറോ ആവാമെന്നും സോഷ്യൽ മീഡിയ പറയുന്നു. രേവതി കലാമന്ദിറിന്റെ ബാനറിൽ കീർത്തി സുരേഷിന്റെ അച്ഛനും നിർമ്മാതാവും നടനുമായ ജി സുരേഷ് കുമാർ നിർമ്മിക്കുന്ന ഈ ചിത്രം നവാഗതനായ വിഷ്ണു ജി രാഘവ് ആണ് രചിച്ചു സംവിധാനം ചെയ്തിരിക്കുന്നത്.

നീൽ ഡി കുന്ന കാമറ ചലിപ്പിച്ചിരിക്കുന്ന ഈ ചിത്രത്തിന് എഡിറ്റിംഗ് നിർവഹിക്കുന്നത് അർജു ബെൻ ആണ്. കൈലാസ് മേനോൻ സംഗീതം ഒരുക്കിയ ഈ ചിത്രത്തിന്റെ ക്രിയേറ്റിവ് സൂപ്പർവൈസർ ആയി ജോലി ചെയ്തിരിക്കുന്നത് പ്രശസ്ത സംവിധായകനും എഡിറ്ററും ആയ മഹേഷ് നാരായണൻ ആണ്. ഉർവശി തീയേറ്റേഴ്സ്, രമ്യ മൂവീസ് എന്നിവ ചേർന്നാണ് ഈ ചിത്രം കേരളത്തിലെ തീയേറ്ററുകളിൽ റിലീസിന് എത്തിക്കുക. ഗീതാഞ്ജലി, റിങ് മാസ്റ്റർ, മരക്കാർ അറബിക്കടലിന്റെ സിംഹം എന്നിവക്ക് ശേഷം കീർത്തി സുരേഷ് നായികാ വേഷം ചെയ്യുന്ന മലയാള ചിത്രമാണ് വാശി. കീർത്തി കൂടുതലും ചെയ്തിട്ടുള്ളത് തമിഴ്- തെലുങ്കു ചിത്രങ്ങളാണ്.