പൃഥ്വിരാജ്- മോഹൻലാൽ ടീമിന്റെ ലുസിഫറിൽ ജോയിൻ ചെയ്ത് ടോവിനോയും..!

യുവ സൂപ്പർ താരം പൃഥ്വിരാജ് സുകുമാരൻ ആദ്യമായി സംവിധാനം ചെയ്യുന്ന ലൂസിഫർ എന്ന ചിത്രത്തിന്റെ ചിത്രീകരണം ഇപ്പോൾ തിരുവനന്തപുരത്തു പുരോഗമിക്കുകയാണ്. കമ്പ്ലീറ്റ് ആക്ടർ മോഹൻലാൽ നായകനാവുന്ന ഈ ചിത്രത്തിന്റെ തിരക്കഥ രചിച്ചിരിക്കുന്നത് മുരളി ഗോപിയും ഈ ബിഗ് ബജറ്റ് പൊളിറ്റിക്കൽ മാസ്സ് ത്രില്ലെർ നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരും ആണ്. വൻ താര നിര അണിനിരക്കുന്ന ഈ ചിത്രത്തിൽ ഇപ്പോൾ യുവതാരം ടോവിനോ തോമസും ജോയിൻ ചെയ്തു കഴിഞ്ഞു. മോഹൻലാലിന്റെ അനുജൻ ആയാണ് ടോവിനോ ഈ ചിത്രത്തിൽ അഭിനയിക്കുന്നത് എന്ന സ്ഥിതീകരിക്കാത്ത റിപ്പോർട്ടുകൾ ഇപ്പോൾ സോഷ്യൽ മീഡിയയിൽ പ്രചരിക്കുന്നുണ്ട്. ഏതായാലും കൂതറ എന്ന ശ്രീനാഥ് രാജേന്ദ്രൻ ചിത്രത്തിന് ശേഷം ടോവിനോ മോഹൻലാലുമൊത്തു അഭിനയിക്കുന്ന ചിത്രമാണ് ലൂസിഫർ.

ടോവിനോ തോമസിനെ കൂടാതെ ഇന്ദ്രജിത് സുകുമാരനും ഒരു നിർണ്ണായക വേഷം ചെയ്യുന്ന ഈ ചിത്രത്തിലെ വില്ലൻ കഥാപാത്രം ആയെത്തുന്നത് ബോളിവുഡ് താമായ വിവേക് ഒബ്‌റോയ് ആണ്. മഞ്ജു വാര്യർ ആണ് ലുസിഫറിലെ നായികാ വേഷം ചെയ്യുന്നത് . ഈ ചിത്രത്തിലെ കഥാപാത്രങ്ങളുടെ പേരോ മറ്റ് വിവരങ്ങളോ പുറത്തു വിട്ടിട്ടില്ല. വണ്ടിപ്പെരിയാർ ഷെഡ്യൂൾ കഴിഞ്ഞ ഈ ചിത്രത്തിന്റെ ട്രിവാൻഡ്രം ഷെഡ്യൂൾ ആണ് ഇപ്പൊ നടക്കുന്നത്. ഇനി മുംബൈ, ദുബായ് എന്നിവിടങ്ങളിലും ലൂസിഫർ ഷൂട്ട് ചെയ്യും എന്നാണ് സൂചന. പൃഥ്വിരാജ് ഈ ചിത്രത്തിൽ അതിഥി വേഷത്തിൽ എത്തുന്നു എന്നും സ്ഥിതീകരിക്കാത്ത റിപ്പോർട്ടുകൾ ഉണ്ട്. കലാഭവൻ ഷാജോൺ, ഫാസിൽ , സാനിയ തുടങ്ങിയവരും ഈ ചിത്രത്തിന്റെ താര നിരയുടെ ഭാഗം ആണ്. മോഹൻലാലിൻറെ ഈ ചിത്രത്തിലെ ലുക്ക് ഇപ്പോഴേ സോഷ്യൽ മീഡിയയിൽ തരംഗമാണ്.