ടോവിനോ തോമസിന്റെ കരിയർ ബെസ്റ്റ് ആക്ഷൻ രംഗങ്ങളുമായി ഒരു കുപ്രസിദ്ധ പയ്യൻ..!

ഈ വരുന്ന നവംബർ ഒൻപതിന് റിലീസ് ചെയ്യാൻ പോകുന്ന ചിത്രമാണ് ടോവിനോ തോമസ് നായകനായ ഒരു കുപ്രസിദ്ധ പയ്യൻ. പ്രശസ്ത സംവിധായകൻ മധുപാൽ ഒരുക്കിയ ഈ ചിത്രം രചിച്ചിരിക്കുന്നത് ജീവൻ ജോബും നിർമ്മിച്ചിരിക്കുന്നത് വി സിനിമാസും ആണ്. ഒരു ത്രില്ലർ ആയി ഒരുക്കിയിരിക്കുന്ന ഈ ചിത്രം ഒരു മർഡർ മിസ്റ്ററി ആണ് കൈകാര്യം ചെയ്യുന്നത് എന്നാണ് ഇതിന്റെ ട്രൈലെർ സൂചിപ്പിക്കുന്നത്. കുറച്ചു യഥാർത്ഥ സംഭവങ്ങളെ അധികരിച്ചാണ് ഈ ചിത്രം രചിച്ചിരിക്കുന്നത്. ഇപ്പോൾ വരുന്ന റിപ്പോർട്ടുകൾ പറയുന്നത്, ആക്ഷൻ രംഗങ്ങൾക്കും മികച്ച പ്രാധാന്യം ഈ ചിത്രത്തിൽ ഉണ്ടെന്നാണ്. ടോവിനോ തോമസിന്റെ കരിയർ ബെസ്റ്റ് ആക്ഷൻ പ്രകടനം ആയിരിക്കും ഈ ചിത്രത്തിലേതു എന്നാണ് സൂചന.

ചിത്രത്തിന്റെ ട്രൈലറിലും നമ്മുക്ക് അതിന്റെ ചില സൂചനകൾ കാണാൻ കഴിയും. തലപ്പാവ് , ഒഴിമുറി എന്നീ നിരൂപക പ്രശംസ നേടിയ ചിത്രങ്ങൾക്ക് ശേഷം മധുപാൽ ആദ്യമായി ഒരുക്കുന്ന ഒരു കൊമേർഷ്യൽ ചിത്രമാണ് ഒരു കുപ്രസിദ്ധ പയ്യൻ. ടോവിനോ തോമസിന് ഒപ്പം ഒരു വലിയ താര നിര തന്നെ ഈ ചിത്രത്തിൽ അണിനിരക്കുന്നുണ്ട്. ശരണ്യ പൊൻവണ്ണൻ, അലെൻസിയർ, നെടുമുടി വേണു, സുജിത് ശങ്കർ, സിദ്ദിഖ്, , സുധീർ കരമന, ബാലു വർഗീസ് , ദിലീഷ് പോത്തൻ എന്നിവരും അഭിനയിക്കുന്ന ഈ ചിത്രത്തിലെ നായികാ വേഷം ചെയ്യുന്നത് നിമിഷാ സജയനും അനു സിത്താരയും ആണ്. നൗഷാദ് ഷെരീഫ് ദൃശ്യങ്ങൾ ഒരുക്കിയ ഈ ചിത്രത്തിന്റെ എഡിറ്റിംഗ് നിർവഹിച്ചിരിക്കുന്നത് പ്രശസ്ത എഡിറ്റർ വി സാജനും സംഗീതം ഒരുക്കിയിരിക്കുന്നത് ഔസേപ്പച്ചനും ആണ്. ഇതിലെ ഗാനങ്ങൾ ഇപ്പോഴേ ഏറെ ശ്രദ്ധ നേടിയെടുത്തിട്ടുണ്ട്.