ഇന്ത്യയിലേക്ക് കിട്ടിയത് വെറും 15 എണ്ണം; അതിലൊരു മിനി കൂപ്പർ സ്വന്തമാക്കി ടോവിനോ തോമസ്..!

മലയാളത്തിന്റെ യുവ താരങ്ങളിൽ പ്രമുഖനായ ഒരാളാണ് നടൻ ടോവിനോ തോമസ്. ഒട്ടേറെ ചിത്രങ്ങളിലൂടെ ഇന്ന് മലയാള സിനിമാ പ്രേമികളുടെ മനസ്സിൽ സ്ഥാനം ലഭിച്ചിട്ടുള്ള ഈ നടൻ മലയാളത്തിലെ ഏറ്റവും തിരക്കേറിയ താരങ്ങളിൽ ഒരാൾ കൂടിയാണ്. ഒരു താരമെന്ന നിലയിലും നടനെന്ന നിലയിലും തന്റെ പ്രതിഭ തെളിയിച്ച ടോവിനോ കഴിഞ്ഞ കുറച്ചു ആഴ്ചകളായി വാർത്തകളിൽ നിറഞ്ഞു നിൽക്കുകയായിരുന്നു. കള എന്ന തന്റെ പുതിയ ചിത്രത്തിന്റെ ഷൂട്ടിങ്ങിനിടെ, സംഘട്ടന രംഗം ചിത്രീകരിക്കുമ്പോൾ വയറിനു ചവിട്ടേറ്റ ടോവിനോയെ ആന്തരിക രക്തസ്രാവം ഉണ്ടായതിനെ തുടർന്ന് ആശുപത്രിയിൽ പ്രവേശിപ്പിക്കേണ്ടി വന്നത് വലിയ വാർത്തയായിരുന്നു. എന്നാൽ പരിക്ക് ഗുരുതരമല്ലാത്തതിനാൽ കുറച്ചു ദിവസത്തെ ആശുപത്രി വാസത്തിനു ശേഷം രണ്ടാഴ്ച്ചയോളമായി ടോവിനോ തോമസ് തന്റെ വീട്ടിൽ വിശ്രമത്തിലായിരുന്നു. ഇപ്പോഴിതാ ടോവിനോ വീണ്ടും വാർത്തകളിൽ നിറയുകയാണ്. എന്നാൽ ഇപ്പോൾ ടോവിനോ തോമസ് വാർത്തയിൽ ഇടം പിടിച്ചത് ഒരു പുതിയ വാഹനം സ്വന്തമാക്കിയതിന് പേരിലാണ്.

ബ്രിട്ടീഷ് കാർ നിർമാതാക്കളായ മിനിയുടെ സൈഡ്‌വാക്ക് എഡിഷൻ ആണ് ടോവിനോ തോമസ് സ്വന്തമാക്കിയിരിക്കുന്നത്. കാർ പ്രേമിയായ ടോവിനോ ഈ പുതിയ വാഹനം കൊച്ചിയിലെ മിനി ഡീലർഷിപ്പിൽ നിന്നാണ് സ്വന്തമാക്കിയത്. ഇന്ത്യയിലേക്ക് ആകെ മൊത്തം പതിനഞ്ചു കാറുകൾ മാത്രമേ ഈ പുതിയ എഡിഷനിൽ കമ്പനി അയച്ചിട്ടുള്ളു. അതിലൊന്നാണ് ടോവിനോ തോമസ് ഇപ്പോൾ സ്വന്തമാക്കിയിരിക്കുന്നത്. ഏകദേശം നാലപ്പത്തിയഞ്ചു ലക്ഷത്തോളം രൂപ ചെലവിട്ടാണ് ടോവിനോ തോമസ് ഈ പുതിയ വാഹനം സ്വന്തം പേരിലാക്കിയിരിക്കുന്നതു. മിന്നൽ മുരളി, കള, നാരദൻ തുടങ്ങി ഒട്ടേറെ ചിത്രങ്ങളാണ് ടോവിനോ തോമസ് നായകനായി അണിയറയിൽ ഒരുങ്ങിക്കൊണ്ടിരിക്കുന്നതു.

ഫോട്ടോ കടപ്പാട്: ഇൻസ്റ്റാഗ്രാം