പൃഥ്വിരാജിൽ നിന്ന് ഈച്ച കോപ്പി എന്ന് ടോവിനോ; ചിത്രീകരണത്തിന് ഒരുങ്ങി താരങ്ങൾ

മലയാള സിനിമയിൽ നല്ല രീതിയിൽ സൗഹൃദം കാത്തു സൂക്ഷിക്കുന്ന താരങ്ങളാണ് പൃഥ്വിരാജ്, ടോവിനോ എന്നിവർ. ഒരുപാട് സിനിമകളിൽ ഇരുവരും ഒന്നിച്ചു അഭിനയിച്ചിട്ടുണ്ട്. പൃഥ്വിരാജിനെ സ്വന്തം ചേട്ടനെ പോലെയാണ് കാണുന്നതെന്ന് പല അഭിമുഖങ്ങളിലും വേദികളിലും ടോവിനോ സൂചിപ്പിച്ചിട്ടുണ്ട്. എന്ന് നിന്റെ മൊയ്ദീൻ, എസ്ര, ലൂസിഫർ തുടങ്ങിയ ചിത്രങ്ങൾ പൃഥ്വിരാജ്-ടോവിനോ കൂട്ടുകെട്ടിൽ പിറന്ന സൂപ്പർഹിറ്റുകൾ ആയിരുന്നു. പൃഥ്വിരാജ് പങ്കുവെച്ച തന്റെ ചിത്രം ഇപ്പോൾ സമൂഹ മാധ്യമങ്ങളിൽ ശ്രദ്ധ നേടുകയാണ്. പബ്ലിക് അവയർനെസ് ഫിലിമിന്റെ ഷൂട്ടിന് ഒരുങ്ങുകയാണെന്നും കൊറോണയെക്കെതിരെയുള്ള പോരാട്ടത്തിന് ഭാഗമാവുക എന്നും പോസ്റ്റിൽ അദ്ദേഹം കുറിക്കുകയുണ്ടായി.

പൃഥ്വിരാജിന്റെ ചിത്രം പ്രേക്ഷകർ ഇരുകൈയും നീട്ടി സ്വീകരിച്ചതിന് തൊട്ട് പിന്നാലെ നടൻ ടോവിനോ തോമസും അതേ ആശയവുമായി മുന്നോട്ട് വന്നിരിക്കുകയാണ്. പൃഥ്വിരാജ് ചിത്രം പകർത്തിയ അതേ സ്ഥലത്ത് നിന്ന് കൊണ്ട് തന്നെ ടോവിനോയും തന്റെ ചിത്രം സ്വയം എടുക്കുകയും സമൂഹ മാധ്യമങ്ങളിൽ പങ്കുവെച്ചിരിക്കുകയാണ്. ഇരുവരുടെയും ലൊക്കേഷനും ക്യാപ്‌ഷനും ഒരേപോലെ വന്നത് ആരാധകരിലും സിനിമ പ്രേമികളിലും കൗതുകമുണർത്തി. തന്റെ പോസ്റ്റ് പൃഥ്വിരാജിന്റെ ഈച്ച കോപ്പി ആണെന്നും ടോവിനോ ക്യാപ്‌ഷനിൽ ഒടുക്കം കൂട്ടിച്ചേർത്തു. പൃഥ്വിരാജിനെ മെൻഷൻ ചെയ്യുവാനും താരം മറന്നില്ല. ടോവിനോയുടെ പോസ്റ്റിന്റെ താഴെ കമെന്റുമായി പൃഥ്വിരാജ് വന്നിരിക്കുകയാണ്. ഈ കളി കൊള്ളാലോ എന്നാണ് പൃഥ്വിരാജ് കുറിച്ചിരിക്കുന്നത്. പഠിക്കുന്ന കാലത്ത് മുതലുള്ള ശീലമാണ് ഇത് എന്ന് ടോവിനോ മറുപടിയും നൽകുകയുണ്ടായി. കോവിഡ് ബ്രിഗേഡിന്റെ ഭാഗമായി ഒരുക്കുന്ന ബോധവൽക്കരണ ചിത്രത്തിന് വേണ്ടിയാണ് ഇപ്പോൾ ഇരുവരും ഒന്നിക്കുന്നത്.