2019 ഇൽ അമ്പരപ്പിക്കുന്ന കളക്ഷനുമായി ഈ അഞ്ചു ചിത്രങ്ങൾ..!

ബോളിവുഡിൽ ഈ വർഷം ഇതുവരെ വിജയം നേടിയ ചിത്രങ്ങളുടെ എണ്ണം കഴിഞ്ഞ വർഷത്തേതിനെ അപേക്ഷിച്ചു കുറവാണ് എന്ന അഭിപ്രായം ഉയർന്നു വരുന്നുണ്ട് എങ്കിലും ഈ അഞ്ചു ചിത്രങ്ങൾ ആദ്യ ദിന കളക്ഷൻ വാരി കൂട്ടി ബോക്സ് ഓഫീസിൽ മികച്ച തുടക്കം നേടിയ ചിത്രങ്ങൾ ആണ്. ബോളിവുഡിൽ ഈ വർഷം ഏറ്റവും വലിയ ആദ്യ ദിന കളക്ഷൻ നേടിയത് സൂപ്പർ താരം സൽമാൻ ഖാൻ നായകനായ ഭാരത്‌ ആണ്. 42.30 കോടി രൂപയാണ് ഈ ചിത്രം ആദ്യ ദിനം ഇന്ത്യയിൽ നിന്ന് മാത്രം വാരി കൂട്ടിയത്. ഇന്ത്യയിൽ വമ്പൻ റിലീസ് ആണ് ഈ ചിത്രം നേടിയെടുത്തത്. എന്നാൽ തുടക്കത്തിൽ നേടിയ ഈ കുതിപ്പ് പിന്നീട് ബോക്സ് ഓഫീസിൽ നില നിർത്താൻ സാധിച്ചില്ല എങ്കിലും ഈ സൽമാൻ ഖാൻ ചിത്രവും 300 കോടിക്ക് മുകളിൽ ആഗോള ബോക്സ് ഓഫീസ് കളക്ഷൻ നേടി എന്നാണ് റിപ്പോർട്ടുകൾ പറയുന്നത്.

ഈ ലിസ്റ്റിൽ രണ്ടാമൻ ആയതു ഈ സ്വാതന്ത്ര്യ ദിനത്തിൽ നമ്മുക്ക് മുന്നിൽ എത്തിയ അക്ഷയ് കുമാർ ചിത്രമായ മിഷൻ മംഗൾ ആണ്. 29.16 കോടി രൂപയാണ് ഈ ചിത്രം ആദ്യ ദിനം നേടിയത്. അക്ഷയ് കുമാറിന്റെ കരിയറിലെ ഏറ്റവും വലിയ ആദ്യ ദിന ഗ്രോസ്സർ ആയ ഈ ചിത്രം വമ്പൻ വിജയം ആവും നേടുക എന്ന് ബോളിവുഡ് ട്രേഡ് അനലിസ്റ്റുകൾ പ്രവചിക്കുന്നു. ഈ വർഷത്തെ ആദ്യ ദിന കളക്ഷൻ ലിസ്റ്റിൽ മൂന്നാമത് എത്തിയ ഹിന്ദി ചിത്രം മൾട്ടി സ്റ്റാർ ചിത്രമായ കളങ്ക്‌ ആണ്. 21.60 കോടി രൂപയാണ് ഈ ചിത്രം ആദ്യ ദിനം നേടിയത്. പക്ഷെ തുടർന്ന് ഒരു മികച്ച വിജയത്തിലേക്ക് കുതിക്കാൻ ഈ ചിത്രത്തിന് സാധിച്ചില്ല. അക്ഷയ് കുമാറിന്റെ തന്നെ മറ്റൊരു സൂപ്പർ ഹിറ്റ് ചിത്രമായ കേസരി ആണ് ഈ ലിസ്റ്റിലെ നാലാമൻ. 21.06 കോടി ആദ്യ ദിനം നേടിയ ഈ ചിത്രം വലിയ ബോക്സ് ഓഫീസ് വിജയം കരസ്ഥമാക്കി. ഈ ലിസ്റ്റിലെ അഞ്ചാമൻ ആയ ഷാഹിദ് കപൂറിന്റെ കബീർ സിംഗ് ആണ് ഈ വർഷത്തെ ബോളിവുഡിലെ ഇതുവരെയുള്ള ഏറ്റവും വലിയ വിജയമായി മാറിയത്. തെലുങ്കു ചിത്രമായ അർജുൻ റെഡ്ഢിയുടെ ഹിന്ദി റീമേക് ആയ ഈ ചിത്രം 20.21 കോടി രൂപയാണ് ആദ്യ ദിനം നേടിയത്. 372 കോടിയോളം ആണ് ഈ ചിത്രത്തിന്റെ ടോട്ടൽ ഗ്രോസ്.