കാത്തിരിപ്പിനൊടുവിൽ നിവിൻ പോളിയുടെ ബിഗ് ബഡ്ജറ്റ് ചിത്രം തുറമുഖം എത്തുന്നു; റിലീസ് ഡേറ്റ് എത്തി

മലയാള സിനിമ പ്രേമികളും നിവിൻ പോളി ആരാധകരും ഏറെ കാത്തിരിക്കുന്ന ചിത്രമാണ് തുറമുഖം. രാജീവ് രവി സംവിധാനം ചെയ്ത ഈ ബ്രഹ്മാണ്ഡ ചിത്രം 2020 ഇൽ റിലീസ് ചെയ്യാനിരുന്ന ചിത്രമാണെമെങ്കിലും, ചില സാമ്പത്തിക പ്രശ്നങ്ങളിൽ കുരുങ്ങി ഇതിന്റെ റിലീസ് മൂന്ന് വർഷത്തോളം നീണ്ടു പോവുകയായിരുന്നു. ഇപ്പോഴിതാ തടസ്സങ്ങളെല്ലാം നീക്കി ഈ ചിത്രം അടുത്ത മാസം റിലീസ് ചെയ്യാൻ പോവുകയാണ്. ലിസ്റ്റിൻ സ്റ്റീഫന്റെ മാജിക് ഫ്രെയിംസ് ആണ് ഈ ചിത്രം റിലീസ് ചെയ്യുന്നത്. ഈ വരുന്ന മാർച്ച് പത്താം തീയതി തുറമുഖം റിലീസ് ചെയ്യുമെന്ന് ലിസ്റ്റിൻ സ്റ്റീഫൻ ഒഫീഷ്യലായി തന്നെ പുറത്ത് വിട്ടു. ആരാധകരും സിനിമാ പ്രേമികളും ഏറെ പ്രതീക്ഷകളോടെ കാത്തിരിക്കുന്ന ഈ ചിത്രം നിവിൻ പോളിയുടെ കരിയറിലെ തന്നെ ഏറ്റവും വലിയ ചിത്രങ്ങളിൽ ഒന്ന് കൂടിയാണ്. നിവിൻ പോളി നായകനായെത്തുന്ന ഈ ചിത്രത്തിൽ ഇന്ദ്രജിത്ത് സുകുമാരൻ, ജോജു ജോർജ് , അർജുൻ അശോകൻ, മണികണ്ഠൻ ആചാരി, സുദേവ് നായർ, നിമിഷാ സജയൻ, ദർശന രാജേന്ദ്രൻ, ശെന്തിൽ കൃഷ്‌ണ, സന്തോഷ് കീഴാറ്റൂർ, പൂർണ്ണിമ ഇന്ദ്രജിത് എന്നിവരും അഭിനയിച്ചിരിക്കുന്നു.

മിനി സ്റ്റുഡിയോയുടെ ബാനറിൽ സുകുമാർ തെക്കേപ്പാട്ട് ആണ് തുറമുഖം നിർമ്മിച്ചിരിക്കുന്നത്. രാജീവ് രവി ഛായാഗ്രഹണവും നിർവഹിച്ചിരിക്കുന്ന ഈ ചിത്രം രചിച്ചിരിക്കുന്നത് ഗോപൻ ചിദംബരനാണ്. ഗോപൻ ചിദംബരന്റെ അച്ഛൻ കെ എം ചിദംബരൻ രചിച്ച ഇതേ പേരിലുള്ള നാടകത്തെ അടിസ്ഥാനമാക്കിയാണ് ഈ ചിത്രം ഒരുക്കിയിരിക്കുന്നത്. ബി അജിത് കുമാർ എഡിറ്റിംഗ് നിർവഹിച്ചിരിക്കുന്ന ഈ ചിത്രത്തിന് സംഗീതം പകർന്നിരിക്കുന്നത് കെ, ഷഹബാസ് അമൻ എന്നിവർ ചേർന്നാണ്. 1940 – 1950 കാലഘട്ടത്തിൽ കൊച്ചി പോർട്ടിന്റെ പശ്ചാത്തലത്തിൽ കഥ പറയുന്ന ചിത്രമാണ് തുറമുഖം.