അടിപിടി ജോസിന് നായികയായി ഇന്ദുലേഖ; മമ്മൂട്ടി- നയൻ‌താര ടീം വീണ്ടും.

മെഗാസ്റ്റാർ മമ്മൂട്ടിയെ നായകനാക്കി വൈശാഖ് ഒരുക്കാൻ പോകുന്ന ബിഗ് ബഡ്ജറ്റ് ആക്ഷൻ കോമഡി ചിത്രത്തെ കുറിച്ചുള്ള വാർത്തകളാണ് ഇപ്പോൾ സോഷ്യൽ മീഡിയയിൽ നിറയുന്നത്. ഒക്ടോബറിൽ ചിത്രീകരണം ആരംഭിക്കാൻ പ്ലാൻ ചെയ്യുന്ന ഈ ചിത്രത്തിന്റെ തിരക്കഥ രചിക്കുന്നത് സൂപ്പർ ഹിറ്റ് സംവിധായകനും രചയിതാവുമായ മിഥുൻ മാനുവൽ തോമസാണ്. മമ്മൂട്ടിയുടെ നിർമ്മാണ ബാനറായ മമ്മൂട്ടി കമ്പനി തന്നെ നിർമ്മിക്കാൻ പോകുന്ന ഈ ചിത്രത്തിന്റെ പേര് “അടിപിടി ജോസ്” എന്നാണെന്നും, ഇതിൽ ഒരു കോട്ടയം അച്ചായൻ കഥാപാത്രമായാണ് മമ്മൂട്ടി അഭിനയിക്കുന്നതെന്നും വാർത്തകൾ വന്നിരുന്നു. ഇപ്പോഴിതാ ഈ ചിത്രത്തിന്റെ താരനിരയെ കുറിച്ചുള്ള റിപ്പോർട്ടുകളാണ് ശ്രദ്ധ നേടുന്നത്. ഈ ചിത്രത്തിൽ മമ്മൂട്ടിയുടെ നായികയായി തെന്നിന്ത്യൻ ലേഡി സൂപ്പർ സ്റ്റാർ നയൻതാരയെ കൊണ്ട് വരാനുള്ള ശ്രമത്തിലാണ് അണിയറ പ്രവർത്തകർ എന്നാണ് സൂചന. ഇന്ദുലേഖ എന്നാണ് ഈ ചിത്രത്തിലെ നായികാ കഥാപാത്രത്തിന്റെ പേരെന്നും വാർത്തകളുണ്ട്.

നയൻതാര ഈ ചിത്രത്തിലേക്ക് വരികയാണെങ്കിൽ ഈ ചിത്രത്തിന്റെ പേര് “അടിപിടി ജോസും ഇന്ദുലേഖയും” എന്നാക്കാനുള്ള പ്ലാനും അണിയറ പ്രവർത്തകർക്കുണ്ടെന്ന തരത്തിലുള്ള വാർത്തകളും സോഷ്യൽ മീഡിയയിൽ പ്രചരിക്കുന്നു. അതോടൊപ്പം തന്നെ ഇതിലെ വമ്പൻ ആക്ഷൻ രംഗങ്ങൾ ഒരുക്കാൻ അൻപ്- അറിവ് ടീമിനെ കൊണ്ടുവരാനുള്ള ചർച്ചകളും നടക്കുന്നതായാണ് സൂചന. പോക്കിരി രാജ, മധുര രാജ എന്നീ സൂപ്പർ ഹിറ്റ് ചിത്രങ്ങൾക്ക് ശേഷം മമ്മൂട്ടി- വൈശാഖ് ടീം ഒന്നിക്കുന്ന ഈ ചിത്രം അടുത്ത വർഷം വേനലവധിക്കാലത്ത് പ്രേക്ഷകരുടെ മുന്നലെത്തിക്കാനുള്ള തയ്യാറെടുപ്പിലാണ് അണിയറ പ്രവർത്തകർ. എറണാകുളം, കോയമ്പത്തൂർ തുടങ്ങിയ സ്ഥലങ്ങളിലായിരിക്കും ഈ ചിത്രം പ്രധാനമായും ചിത്രീകരിക്കുക എന്നാണ് ഇപ്പോൾ ലഭിക്കുന്ന വിവരങ്ങൾ പറയുന്നത്. തസ്കരവീരൻ, രാപ്പകൽ, ഭാസ്കർ ദി റാസ്കൽ, പുതിയ നിയമം തുടങ്ങിയ ചിത്രങ്ങളിലാണ് മമ്മൂട്ടി- നയൻ താര ടീം ഇതിന് മുൻപ് ഒന്നിച്ചിട്ടുള്ളത്.