തെന്നിന്ത്യയിലെ സൂപ്പർ നായികയുടെ പേരിട്ട ഞാൻ സമ്പൂർണ്ണ പരാജിതനായി വീട്ടിലിരിക്കുന്നു, നായിക ഇതൊന്നുമറിയാതെ രജനീകാന്തിനൊപ്പം അഭിനയിക്കുന്നു

ഇന്ന് തെന്നിന്ത്യൻ സിനിമയിലെ ലേഡി സൂപ്പർ സ്റ്റാർ ആണ് നയൻതാര. തമിഴ് സിനിമയിലൂടെ ആണ് ഈ നടി ലേഡി സൂപ്പർ സ്റ്റാറായി ഉയർന്നത് എങ്കിലും മലയാളിയായ ഈ നടി അരങ്ങേറ്റം കുറിച്ചത് സത്യൻ അന്തിക്കാട് സംവിധാനം ചെയ്ത ജയറാം ചിത്രമായ മനസ്സിനക്കരെയിലൂടെയാണ്. ഡയാന എന്ന ശരിക്കുള്ള പേര് മാറ്റി നയൻ താര എന്ന പേരിൽ ആണ് ആ ചിത്രത്തിലൂടെ ഈ നടിയെ അന്ന് സത്യൻ അന്തിക്കാട് മലയാള സിനിമാ പ്രേക്ഷകർക്ക് മുന്നിലവതരിപ്പിച്ചത്. അതിനു ശേഷം മലയാളത്തിൽ മോഹൻലാൽ, മമ്മൂട്ടി, ദിലീപ് തുടങ്ങിയ സൂപ്പർ തരങ്ങൾക്കൊപ്പമെല്ലാം അഭിനയിച്ച നയൻതാര തമിഴിലേയും തെലുങ്കിലെയും സൂപ്പർ താരങ്ങളുടെയും നായികയായി. ഇപ്പോഴിതാ ഒരു സിനിമാ പ്രവർത്തകൻ 2003 ഇൽ ഈ നടിക്ക് നയൻതാര എന്ന പേരു വന്ന വഴിയേ കുറിച്ചു പറയുന്ന കഥയാണ്‌ ശ്രദ്ധ നേടുന്നത്.

ജോൺ ഡിറ്റോ എന്ന സിനിമാ പ്രവർത്തകൻ ആണ് തന്റെ ഫേസ്ബുക്ക് പോസ്റ്റിലൂടെ ഈ കാര്യം പറയുന്നത്. അദ്ദേഹത്തിന്റെ വാക്കുകൾ ഇങ്ങനെ, 2003. തിരക്കഥാകൃത്തും സംവിധായകനുമായ A K Sajan സാറിന്റെ സ്ക്രിപ്റ്റ് അസിസ്റ്റന്റായി ഞാൻ പ്രവർത്തിച്ചിരുന്ന കാലം. ഒരു സിനിമയുടെ തിരക്കഥാ രചനയ്ക്കായി സാറും ഞാനും ചെറുതുരുത്തി റെസ്റ്റ് ഹൗസിൽ താമസിക്കുകയായിരുന്നു. ഒരു ദിവസം വൈകുന്നേരം പ്രസിദ്ധ സ്റ്റിൽ ഫോട്ടോഗ്രാഫർ സ്വാമിനാഥൻ സാറിനെക്കാണാൻ എത്തി. വിശേഷം പറഞ്ഞ കൂട്ടത്തിൽ ഷൊർണ്ണൂരിൽ സത്യൻ അന്തിക്കാടിന്റെ ജയറാം പടം നടക്കുന്നുവെന്നും അതിലെ പുതുമുഖ നായികയ്ക്ക് ഒരു പേരു വേണമെന്നും പറഞ്ഞു. ക്രിസ്ത്യൻ പെൺകുട്ടി ഡയാനയെന്നാണ് പേരത്രെ. ഡിറ്റോ ഒരു പേര് ആലോചിക്ക് സർ നിർദ്ദേശിച്ചു.

ആലോചിക്കാനും ചിന്തിക്കാനും മാത്രമറിയാവുന്ന ഞാൻ ചിന്തിച്ചു. മാധവിക്കുട്ടിയുടെ ഒരു കഥയിലെ ഒരു പെൺകുട്ടിയുടെ ബംഗാളിപ്പേര് ചിന്തയിലുടക്കി. നയൻതാര. ഞാൻ പറഞ്ഞു: നയൻതാര. സാജൻ സാർ തലയാട്ടി. സ്വാമിനാഥൻ സാറും തലകുലുക്കി. പിന്നീട് മനസ്സിനക്കരെ എന്ന സിനിമയുടെ പേരും നായിക നയൻതാരയുടെ പേരും സത്യൻ സർ അനൗൺസ് ചെയ്തു. അങ്ങനെ തെന്നിന്ത്യയിലെ സൂപ്പർ നായികയുടെ പേരിട്ട ഞാൻ സമ്പൂർണ്ണ പരാജിതനായി വീട്ടിലിരിക്കുന്നു. നായിക ഇതൊന്നുമറിയാതെ തലൈവർ രജനീകാന്തിനൊപ്പം അഭിനയിക്കുന്നു.

ഇന്ന് സാജൻ സാറിനെക്കാണാൻ അദ്ദേഹത്തിന്റെ വീട്ടിൽച്ചെന്നപ്പോൾ പഴയ കാര്യങ്ങൾ പറഞ്ഞ കൂട്ടത്തിലാണ് ഈ കാര്യം വീണ്ടും ഓർത്തത്. പുതിയ നിയമം എന്ന മമ്മൂട്ടിപ്പടം സാജൻ സർ ഡയറക്റ്റ് ചെയ്തപ്പോൾ നായികയായ നയൻതാരയെ കാണാൻ കഴിഞ്ഞിരുന്നില്ല. എങ്കിൽ ഈക്കഥ പറയാമായിരുന്നു.

https://www.facebook.com/johnditto.pr/posts/3007235042622722