ആനക്കാട്ടിൽ ചാക്കോച്ചി വരും; ലേലം 2 മാർച്ചിൽ തുടങ്ങും..

മലയാള സിനിമ പ്രേമികളെ ത്രസിപ്പിച്ച ഒരു സൂപ്പർ ഹിറ്റ് സിനിമയാണ് വർഷങ്ങൾക്കു മുൻപ് മാസ്റ്റർ ഡയറക്ടർ ജോഷി സംവിധാനം ചെയ്ത ലേലം എന്ന സുരേഷ് ഗോപി ചിത്രം. രഞ്ജി പണിക്കർ തിരക്കഥ രചിച്ച ഈ ഫാമിലി ആക്ഷൻ ചിത്രം ഇന്നും പ്രേക്ഷകർ നെഞ്ചോടു ചേർക്കുന്ന ചിത്രമാണ്. ഇതിലെ ഓരോ കഥാപാത്രങ്ങളും സംഭാഷണങ്ങളും ഇന്നത്തെ യുവാക്കൾക്കിടയിൽ പോലും പോപ്പുലർ ആണ്.

സുരേഷ് ഗോപി അവതരിപ്പിച്ച ആനക്കാട്ടിൽ ചാക്കോച്ചി എന്ന കഥാപാത്രം ആരാധകരെ ആവേശത്തിന്റെ കൊടുമുടിയിൽ എത്തിച്ച ഒരു കഥാപാത്രം ആയിരുന്നു എന്നും പറയാം. ഒരുപക്ഷെ സുരേഷ് ഗോപിയുടെ കരിയറിലെ തന്നെ ഏറ്റവും അധികം ആരാധകർ ഉള്ള കഥാപാത്രങ്ങളിലൊന്നാണ് ആനക്കാട്ടിൽ ചാക്കോച്ചി. ഇപ്പോഴിതാ ലേലം 2 എത്തുകയാണ്. ഈ ചിത്രത്തിന്റെ രണ്ടാം ഭാഗത്തിന് ഇട്ടിരിക്കുന്ന പേര് തന്നെ ആനക്കാട്ടിൽ ചാക്കോച്ചി എന്നാണ്.

രഞ്ജി പണിക്കർ തന്നെ തിരക്കഥ രചിച്ചിരിക്കുന്ന ചിത്രത്തിൽ സുരേഷ് ഗോപി നായക വേഷം അവതരിപ്പിക്കും. രഞ്ജി പണിക്കരുടെ മകൻ നിതിൻ രഞ്ജി പണിക്കർ ആണ് ഈ ചിത്രം സംവിധാനം ചെയ്യാൻ പോകുന്നത്. കസബ എന്ന മമ്മൂട്ടി ചിത്രം ഒരുക്കിക്കൊണ്ടാണ് നിതിൻ രഞ്ജി പണിക്കർ അരങ്ങേറിയത്. ഈ വരുന്ന മാർച്ച് മാസത്തിൽ ലേലം രണ്ടാം ഭാഗം ആരംഭിക്കും എന്നാണ് അണിയറ പ്രവർത്തകർ ഒഫീഷ്യൽ ആയി പുറത്തു വിട്ടിരിക്കുന്ന വിവരം.

ഇതിനിടക്ക് സുരേഷ് ഗോപിക്കു പകരം മോഹൻലാൽ ഈ ചിത്രത്തിൽ അഭിനയിക്കും എന്നുള്ള ഒരു വ്യാജ വാർത്തയും സോഷ്യൽ മീഡിയയിൽ പരന്നിരുന്നു. സുരേഷ് ഗോപിയുടെ രാഷ്ട്രീയ തിരക്കുകൾ കാരണം, അണിയറ പ്രവർത്തകർ മോഹൻലാലിനെ സമീപിച്ചു എന്നായിരുന്നു വാർത്ത. പക്ഷെ അതെല്ലാം തള്ളി കളഞ്ഞു കൊണ്ടാണ് ഇപ്പോൾ ഈ ചിത്രം സുരേഷ് ഗോപിയെ വെച്ച് തന്നെ മാർച്ചിൽ ആരംഭിക്കും എന്ന വിവരം പുറത്തു വന്നത്. രഞ്ജി പണിക്കർ തന്നെയാണ് ഈ ചിത്രം നിർമ്മിക്കുന്നത്.