ദിലീപ് നിർമിച്ച് അനൂപ് പദ്മനാഭൻ സംവിധാനം ചെയ്യുന്ന ‘തട്ടാശ്ശേരി കൂട്ടം’ ഇന്ന് മുതൽ; തീയേറ്റർ ലിസ്റ്റ് ഇതാ

ജനപ്രിയ നായകൻ ദിലീപ് നിർമ്മിച്ച്, അദ്ദേഹത്തിന്റെ അനുജൻ അനൂപ് പദ്മനാഭൻ സംവിധാനം ചെയ്ത ചിത്രമാണ് തട്ടാശ്ശേരി കൂട്ടം. അനൂപിന്റെ ആദ്യ ചിത്രം കൂടിയാണിത്. ഇന്ന് മുതൽ ഈ ചിത്രത്തിന്റെ പ്രദർശനം കേരളത്തിൽ ആരംഭിക്കുകയാണ്. ഇതിന്റെ തീയേറ്റർ ലിസ്റ്റ് ഇവിടെ ചേർക്കുന്നു. യുവതാര കൂട്ടായ്മയിൽ ഒരുങ്ങിയ ഈ ചിത്രത്തിന് മികച്ച റിലീസ് ആണ് കേരളത്തിൽ ലഭിച്ചിരിക്കുന്നത്. ഗ്രാൻഡ് പ്രൊഡക്ഷൻസിന്റെ ബാനറിൽ ദിലീപ് നിർമ്മിച്ചിരിക്കുന്ന ഈ ചിത്രത്തിൽ അർജുൻ അശോകൻ, ഗണപതി, അനീഷ് ഗോപാൽ, ഉണ്ണി രാജൻ പി ദേവ്, അപ്പു എന്നിവർ പ്രധാന വേഷങ്ങൾ ചെയ്യുന്നു. ഇവരെ കൂടാതെ വിജയ രാഘവൻ, സിദ്ദിഖ്, സുരേഷ് മേനോൻ, ഷൈനി സാറ, ശ്രീലക്ഷ്മി എന്നിവരും വേഷമിട്ട ഈ ചിത്രം രചിച്ചത് സന്തോഷ് എച്ചിക്കാനമാണ്. ജിയോ പി വി കഥ രചിച്ച ഈ ചിത്രത്തിൽ സഞ്ജയ് എന്ന കഥാപാത്രമായി അർജുൻ അശോകൻ എത്തുമ്പോൾ നായികാ കഥാപാത്രമായ ആതിരയായി എത്തുന്നത് പ്രിയംവദയാണ്.

ജിതിൻ സ്റ്റാൻസിലാവോസ് ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് വി സാജനാണ്. ബി. കെ ഹരിനാരായണൻ, രാജീവ്‌ ഗോവിന്ദൻ, സഖി എൽസ എന്നിവർ വരികൾ രചിച്ച ഈ ചിത്രത്തിലെ ഗാനങ്ങൾക്ക് ഈണം പകർന്നത് റാം ശരത് ആണ്. ചിരിയും പ്രണയവും ആക്ഷനും ത്രില്ലും കൂട്ടിയിണക്കിയാണ് ഈ ചിത്രം ഒരുക്കിയിരിക്കുന്നതെന്ന സൂചനയാണ് ഇതിന്റെ ടീസർ, ട്രൈലെർ, ഇതിലെ ഒരു ഗാനം എന്നിവ നമ്മുക്ക് തരുന്നത്. വിനീത് ശ്രീനിവാസൻ സംവിധായകനായി അരങ്ങേറ്റം കുറിച്ച മലർവാടി ആർട്സ് ക്ലബ് എന്ന ചിത്രത്തിന് ശേഷം യുവതാരങ്ങളെ വെച്ച് ദിലീപ് നിർമ്മിച്ച ചിത്രം കൂടിയാണ് തട്ടാശേരി കൂട്ടം.