ഈ വർഷം കണ്ടതിൽ ഏറ്റവും കൂടുതൽ ഇഷ്ടപെട്ട ചിത്രം തല്ലുമാല:കാരണം വെളിപ്പെടുത്തി ലോകേഷ് കനകരാജ്

ഇന്ന് തമിഴ് സിനിമയിലെ ഏറ്റവും മികച്ച സംവിധായകരിൽ ഒരാളാണ് ലോകേഷ് കനകരാജ്. മാത്രമല്ല, ചെയ്ത ചിത്രങ്ങൾ എല്ലാം സൂപ്പർ വിജയമായതോടെ തമിഴിലെ ഏറ്റവും വിലപിടിപ്പുള്ള സംവിധായകരിലൊരാൾ കൂടിയാണ് ലോകേഷ്. മാനഗരം എന്ന ചിത്രമൊരുക്കി അരങ്ങേറ്റം കുറിച്ച ലോകേഷ്, അതിന് ശേഷം കാർത്തി നായകനായ കൈതി, ദളപതി വിജയ് നായകനായ മാസ്റ്റർ, കമൽ ഹാസൻ നായകനായ വിക്രം എന്നിവയും സംവിധാനം ചെയ്തു. കമൽ ഹാസനൊപ്പം വിജയ് സേതുപതി, ഫഹദ് ഫാസിൽ എന്നിവരും വേഷമിട്ട വിക്രം തമിഴിലെ ഇൻഡസ്ട്രി ഹിറ്റായും മാറിയിരുന്നു. ഇപ്പോൾ ദളപതി വിജയ് നായകനായി എത്തുന്ന ദളപതി 67 ഒരുക്കാൻ പോവുകയാണ് ലോകേഷ്. ഇപ്പോഴിതാ, ഈ വർഷം താൻ കണ്ടതിൽ ഏറ്റവും കൂടുതലിഷ്ടപെട്ട മലയാള ചിത്രം ഏതാണെന്നും അതിനുള്ള കാരണവും വെളിപ്പെടുത്തുകയാണ് ഈ തമിഴ് സംവിധായകൻ.

ഫിലിം കമ്പാനിയന്റെ ഇന്ത്യന്‍ ഫിലിം മേക്കേഴ്‌സ് അഡ്ഡയിൽ വെച്ചാണ് ലോകേഷ് കനകരാജ് ഈ വെളിപ്പെടുത്തൽ നടത്തിയത്. തനിക്ക് ഈ വർഷം കണ്ടതിൽ ഏറ്റവും ഇഷ്ടപ്പെട്ടത്, തല്ലുമാല എന്ന മലയാള ചിത്രമാണെന്നും, താനത് രണ്ടോ- മൂന്നോ തവണ തുടർച്ചയായി കണ്ടെന്നും ലോകേഷ് പറയുന്നു. ആ ചിത്രത്തിന്റെ മേക്കിങ് സ്റ്റൈൽ ആണ് തന്നെ വലുതായി ആകർഷിച്ചതെന്നും ലോകേഷ് വിശദീകരിച്ചു. ടോവിനോ തോമസിനെ നായകനാക്കി ഖാലിദ് റഹ്മാൻ സംവിധാനം ചെയ്ത തല്ലുമാല കേരളത്തിൽ സൂപ്പർ ഹിറ്റായി മാറിയ ചിത്രമാണ്. നിര്‍മാതാവ് സ്വപ്‌ന ദത്ത് ചലസാനി, സംവിധായകരായ ഗൗതം വാസുദേവ് മേനോന്‍, എസ്.എസ്. രാജമൗലി, നടനും സംവിധായകനുമായ കമല്‍ ഹാസന്‍, പൃഥ്വിരാജ് സുകുമാരൻ എന്നിവരും ലോകേഷിനൊപ്പം ഫിലിം കമ്പാനിയന്റെ ഇന്ത്യന്‍ ഫിലിം മേക്കേഴ്‌സ് അഡ്ഡയിൽ പങ്കെടുത്തു.