സ്റ്റൈലിഷായി ദളപതി വിജയ്; വാരിസ് ദീപാവലി സ്പെഷ്യൽ പോസ്റ്റർ സൂപ്പർ ഹിറ്റ്

തമിഴകത്തിന്റെ ദളപതി വിജയ് നായകനായി എത്തുന്ന ഏറ്റവും പുതിയ ചിത്രമായ വാരിസിന്റെ ദീപാവലി സ്പെഷ്യൽ പോസ്റ്റർ ആണ് ഇപ്പോൾ സോഷ്യൽ മീഡിയയിൽ വൈറലാവുന്നത്. സ്റ്റൈലിഷ് ലുക്കിൽ വിജയ്‌യെ കാണാൻ സാധിക്കുന്ന ഈ പോസ്റ്റർ, ഒരു ആക്ഷൻ രംഗത്തിൽ നിന്നുള്ള സ്റ്റിൽ ആണെന്നും മനസ്സിലാക്കിയെടുക്കാൻ സാധിക്കുന്നുണ്ട്. അടുത്ത ജനുവരിയിൽ പൊങ്കൽ റിലീസായി വാരിസ് എത്തുമെന്നുള്ള ഉറപ്പും ആരാധകർക്ക് ഈ പോസ്റ്റർ നൽകുന്നു. ഈ ചിത്രത്തിന്റെ ഫസ്റ്റ് ലുക്ക്, സെക്കന്റ് ലുക്ക് പോസ്റ്ററുകൾ, ഏതാനും ലൊക്കേഷൻ സെൽഫികൾ എന്നിവയും നേരത്തെ തന്നെ സോഷ്യൽ മീഡിയയിൽ വൈറലാണ്. ഈ ചിത്രത്തില്‍ ഒരു ആപ്പ് ഡെവലപ്പര്‍ ആയിട്ടാവും വിജയ് അഭിനയിക്കുന്നതെന്നും, ഇതിലെ ദളപതിയുടെ കഥാപാത്രത്തിന്റെ പേര് വിജയ് രാജേന്ദ്രന്‍ എന്നായിരിക്കുമെന്നും ചില റിപ്പോർട്ടുകൾ നേരത്തെ വന്നിരുന്നു.

വംശി പൈഡിപ്പള്ളി സംവിധാനം ചെയ്യുന്ന ഈ ചിത്രത്തിന്റെ അവസാനഘട്ട ഷൂട്ടിങ്ങാണ് ഇപ്പോൾ നടക്കുന്നത്. ശ്രീ വെങ്കടേശ്വര ക്രിയേഷന്‍സിന്‍റെ ബാനറില്‍ ദില്‍ രാജുവും ശിരീഷും ചേർന്ന് നിർമ്മിക്കുന്ന വാരിസിൽ ശരത് കുമാര്‍, പ്രകാശ് രാജ്, ശ്യാം, പ്രഭു, ജയസുധ, ശ്രീകാന്ത്, ഖുശ്ബു, സംഗീത കൃഷ്‍ണ തുടങ്ങിയവരും വേഷമിടുന്നുണ്ട്. എസ് തമൻ സംഗീത സംവിധാനം നിർവഹിക്കുന്ന ഈ ചിത്രത്തിൽ രശ്‌മിക മന്ദാനയാണ് നായികാ വേഷം ചെയ്യുന്നത്. ഒരു പക്കാ മാസ്സ് മസാല എന്റെർറ്റൈനെർ ആയൊരുക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് കാർത്തിക് പളനിയും എഡിറ്റ് ചെയ്യുന്നത് പ്രവീൺ കെ എല്ലുമാണ്. ഈ ചിത്രത്തിൽ വിജയ് ഒരു ഗാനവുമാലപിക്കുന്നുണ്ട്. വിജയ്‌യുടെ അറുപത്തിയാറാം ചിത്രമായാണ് വാരിസ് ഒരുങ്ങുന്നത്.