സൂര്യ ചിത്രമായ താന സേർന്താ കൂട്ടത്തിലെ സൊഡക്ക് സോങ് തരംഗമാവുന്നു ..!

നാനും റൗഡി താൻ എന്ന സൂപ്പർ ഹിറ്റ് ചിത്രമൊരുക്കിയ വിഘ്‌നേശ് ശിവൻ നടിപ്പിൻ നായകൻ സൂര്യയെ നായകനാക്കി ഒരുക്കിയ ചിത്രമാണ് താന സെർന്ത കൂട്ടം. പൊങ്കൽ റിലീസ് പ്രതീക്ഷിക്കുന്ന ഈ ചിത്രത്തിലെ സൊഡക്ക് സോങ് ഇപ്പോൾ റിലീസ് ചെയ്തിരിക്കുകയാണ്. ആദ്യം ഈ ഗാനത്തിന്റെ ഒരു ടീസർ പോലെ റിലീസ് ചെയ്തിരുന്നു. സോഷ്യൽ മീഡിയയിലും യൂട്യൂബിലുമെല്ലാം വമ്പൻ തരംഗം സൃഷ്‌ടിച്ച ആ സോങ് ടീസറിന് ശേഷം ഇപ്പോഴിതാ ആ സോങ് മുഴുവനായി പ്രേക്ഷകരുടെ മുൻപിൽ എത്തിയിരിക്കുകയാണ്. തമിഴിലെ ഏറ്റവും പോപ്പുലർ ആയ സംഗീത സംവിധായകരിൽ ഒരാളായ അനിരുദ്ധ് രവിചന്ദർ ആണ് ഈ ചിത്രത്തിലെ ഗാനങ്ങൾക്ക് ഈണം പകർന്നിരിക്കുന്നത്. കീർത്തി സുരേഷ് ആണ് ഈ ചിത്രത്തിൽ സൂര്യയുടെ നായിക ആയെത്തുന്നത്.

സ്റ്റുഡിയോ ഗ്രീൻ പ്രൊഡക്ഷൻസിന്റെ ബാനറിൽ ജ്ഞാനവേൽ രാജ നിർമ്മിച്ചിരിക്കുന്ന ഈ ചിത്രം രചിച്ചിരിക്കുന്നത് സംവിധായകൻ തന്നെയാണ്. കാർത്തിക്, നന്ദ, ആർ ജെ ബാലാജി, സെന്തിൽ എന്നിവരും ഈ ചിത്രത്തിന്റെ താര നിരയുടെ ഭാഗമാണ്. ദിനേശ് കൃഷ്ണൻ ഛായാഗ്രഹണം നിർവഹിച്ചിരിക്കുന്ന ഈ ചിത്രത്തിന് വേണ്ടി എഡിറ്റിംഗ് നിർവഹിച്ചിരിക്കുന്നത് ശ്രീകർ പ്രസാദ് ആണ്. ജനുവരിയിൽ ആയിരിക്കും താന സെർന്ത കൂട്ടം റിലീസ് ചെയ്യുക എന്നാണ് ഇപ്പോൾ ലഭിക്കുന്ന വിവരങ്ങൾ പറയുന്നത്. സൂര്യ ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ഇത്.