ഹോളിവുഡ് സ്റ്റൈലിൽ ഒരു തമിഴ് ആക്ഷൻ ചിത്രം; ആര്യ- ഐശ്വര്യ ലക്ഷ്മി ടീമിന്റെ ക്യാപ്റ്റൻ ഓണം റിലീസ്

ഹോളിവുഡ് ചിത്രങ്ങളെ അനുസ്‌മരിപ്പിക്കുന്ന ഒരു ആക്ഷൻ ചിത്രവുമായി എത്തുകയാണ് തമിഴിലെ പ്രശസ്ത താരങ്ങളിലൊരായ ആര്യ. ക്യാപ്റ്റൻ എന്ന് പേരിട്ടിരിക്കുന്ന ഈ ചിത്രം ഓണം റിലീസായി സെപ്റ്റംബർ എട്ടിന് പ്രേക്ഷകരുടെ മുന്നിലെത്തും. ഈ ചിത്രത്തിന്റെ മലയാളം പോസ്റ്ററുകളും ഇപ്പോൾ പുറത്തു വന്നു കഴിഞ്ഞു. ഒരു വമ്പൻ ആക്ഷൻ ത്രില്ലറായി ഒരുക്കിയിരിക്കുന്ന ഈ ചിത്രത്തിന്റെ ട്രൈലെർ സൂപ്പർ ഹിറ്റായി മാറിയിരുന്നു. അന്യഗ്രഹ ജീവികളെ വേട്ടയാടാൻ നിയോഗിക്കപ്പെടുന്ന ഒരു മിലിറ്ററി ഓഫീസറുടെ കഥയാണ് ഈ ചിത്രം പറയുന്നതെന്ന സൂചനയാണ് ട്രൈലെർ നമ്മുക്ക് തന്നത്. ഇന്ത്യൻ സിനിമയിൽ തന്നെ അധികം കണ്ടു പരിചയിച്ചിട്ടില്ലാത്ത ഒരു പ്രമേയമാണ് ഈ ചിത്രം ചർച്ച ചെയ്യുന്നത് എന്നത് തന്നെയാണ് ഇതിന്റെ ഹൈലൈറ്റ്. എന്നും വ്യത്യസ്തമായ ചിത്രങ്ങളുമായി നമ്മുടെ മുന്നിലെത്തിയിട്ടുള്ള ശക്തി സൗന്ദർ രാജൻ രചിച്ചു സംവിധാനം ചെയ്തിരിക്കുന്ന ഈ ചിത്രം നിർമ്മിച്ചിരിക്കുന്നത് തിങ്ക് സ്റ്റുഡിയോസ് ആണ്.

മലയാള നായികാ താരം ഐശ്വര്യ ലക്ഷ്മി നായികാ വേഷം ചെയ്യുന്ന ഈ ചിത്രത്തിൽ പഴയ തെന്നിന്ത്യൻ സൂപ്പർ നായികാതാരമായ സിമ്രാനും നിർണ്ണായക വേഷം ചെയ്തിട്ടുണ്ട്. എസ് യുവ ഛായാഗ്രഹണം നിർവഹിച്ചിരിക്കുന്ന ഈ ചിത്രത്തിന് സംഗീതമൊരുക്കിയത് ഡി ഇമ്മനാണ്. പ്രദീപ് ഇ രാഘവാണ് ക്യാപ്റ്റന്റെ എഡിറ്റിംഗ് നിർവഹിച്ചിരിക്കുന്നത്. ക്യാപ്റ്റൻ കൂടാതെ മണി രത്‌നം സംവിധാനം ചെയ്ത ബ്രഹ്മാണ്ഡ തമിഴ് ചിത്രമായ പൊന്നിയിൻ സെൽവൻ ആണ് ഐശ്വര്യ ലക്ഷ്മിയഭിനയിച്ചു ഇനി റിലീസ് ചെയ്യാനുള്ള തമിഴ് ചിത്രം. വിശാലിന്റെ ആക്ഷനെന്ന ചിത്രത്തിലൂടെതമിഴിൽ അരങ്ങേറിയ ഈ നടി ജഗമേ തന്തിരം, തമിഴ് ആന്തോളജി ചിത്രമായ പുത്തം പുതു കാലൈ വിടിയാതാ, ഗാർഗി എന്നിവയിലും അഭിനയിച്ചു.