പ്രിവ്യൂ ഷോ കണ്ട് വില്ലനെ വാനോളം പുകഴ്ത്തി തമിഴ് സംവിധായകൻ മിഷ്കിൻ

മോഹൻലാലിനെ നായകനാക്കി ബി ഉണ്ണികൃഷ്ണൻ സംവിധാനം ചെയ്യുന്ന വില്ലൻ നാളെ പ്രദർശനത്തിനെത്തുകയാണ്. പുലിമുരുകനെ തകർക്കുന്ന അഡ്വാൻസ് ബുക്കിങ് ആണ് വില്ലന് ലഭിക്കുന്നത്. ആദ്യ ദിന കലക്ഷൻ റെക്കോർഡ് വില്ലൻ സ്വന്തമാക്കും എന്നാണ് അണിയറ പ്രവർത്തകരും ആരാധകരും പ്രതീക്ഷിക്കുന്നത്.

മോഹൻലാലിനൊപ്പം മഞ്ജു വാര്യർ, തമിഴ് നടൻ വിശാൽ, ഹൻസിക, തെലുങ്ക് താരം ശ്രീകാന്ത് തുടങ്ങിയവരും ചിത്രത്തിൽ പ്രധാനവേഷങ്ങളിൽ എത്തുന്നുണ്ട്.

തമിഴിലെ സംവിധായകർക്കും താരങ്ങൾക്കുമായി ചെന്നൈയിൽ കഴിഞ്ഞ ദിവസം വില്ലന്റെ ഒരു പ്രിവ്യു ഷോ സംഘടിപ്പിച്ചിരുന്നു. ഗംഭീര അഭിപ്രായമാണ് പ്രിവ്യൂ ഷോ കഴിഞ്ഞപ്പോൾ വില്ലന് ലഭിച്ചത്.

വില്ലനിൽ അതിഗംഭീരപ്രകടനമാണ് മോഹൻലാൽ കാഴ്ചവച്ചിരിക്കുന്നതെന്നും ഒരു ഇമോഷനൽ ത്രില്ലറാണ് വില്ലനെന്നുമാണ് പ്രശസ്ത തമിഴ് സംവിധായകൻ മിഷ്കിൻ വില്ലൻ കണ്ട ശേഷം പറഞ്ഞത്. മഞ്ജു വാര്യർ, വിശാൽ തുടങ്ങിയ താരങ്ങളുടെ പക്വതയാർന്ന പ്രകടനത്തെയും മിഷ്കിൻ പ്രശംസിച്ചു.

സംവിധായകൻ ബി ഉണ്ണികൃഷ്ണൻ മനോഹരമായി ഒരുക്കിയ ചിത്രമാണിതെന്ന് പറഞ്ഞ ശേഷം എല്ലാ അണിയറ പ്രവർത്തകർക്കും ആശംസകളും മിഷ്കിൻ നേർന്നു.