ചരിത്രം സൃഷ്ടിക്കാൻ സെയ്‌റ നരസിംഹ റെഡ്ഢി ഇന്ന് മുതൽ; റിലീസ് നാലു ഭാഷകളിൽ..!

മെഗാ സ്റ്റാർ ചിരഞ്ജീവി തന്റെ കരിയറിലെ ഏറ്റവും വലിയ ചിത്രവുമായി ഇന്ന് എത്തുകയാണ്. ലോകമെമ്പാടുമുള്ള സ്‌ക്രീനുകളിൽ ഇന്ന് അദ്ദേഹം നായകനായി എത്തുന്ന സെയ്‌റ നരസിംഹ റെഡ്ഢി എന്ന ചിത്രം റിലീസ് ചെയ്യും. പ്രശസ്ത നിർമ്മാണ – വിതരണ കമ്പനിയായ ജെമിനി സ്റ്റുഡിയോസ് ആണ് ഈ ചിത്രം കേരളത്തിൽ വമ്പൻ റിലീസ് ആയി എത്തിക്കുന്നത്. മെഗാ സ്റ്റാർ ചിരഞ്ജീവിയുടെ മകൻ റാം ചരൺ നിർമ്മിച്ചിരിക്കുന്ന ഈ ചിത്രം എഴുതി സംവിധാനം ചെയ്തിരിക്കുന്നത് സുരീന്ദർ റെഡ്‌ഡി ആണ്. ഇന്ത്യയുടെ ഒന്നാം സ്വാതന്ത്ര്യ സമരത്തിനും മുൻപേ, തെലുങ്കു നാട്ടിൽ നിന്നും ബ്രിട്ടീഷ് ആർമിക്കു എതിരെ പട പൊരുതിയ നരസിംഹ റെഡ്ഢി എന്ന പോരാളിയുടെ കഥയാണ് ഈ ചിത്രം പറയുന്നത്.

തെലുങ്കു, തമിഴ്, മലയാളം, ഹിന്ദി എന്നിങ്ങനെ നാലു ഭാഷകളിൽ ആയാണ് ഈ ചിത്രം റിലീസ് ചെയ്യുന്നത്. ഇതിന്റെ മലയാളം, തമിഴ്, തെലുങ്കു വേർഷനുകൾ ആണ് കേരളത്തിൽ എത്തിക്കുന്നത്. ഈ ചിത്രത്തിന്റെ മലയാളം പതിപ്പിന് വേണ്ടി വിവരണം നൽകിയിരിക്കുന്നത് മോഹൻലാൽ ആണ്. തമിഴിൽ കമൽ ഹാസനും തെലുങ്കിൽ പവൻ കല്യാണും ആണ് ഈ വിവരണങ്ങൾ നൽകുന്നത്. മെഗാ സ്റ്റാർ ചിരഞ്ജീവിക്ക്‌ ഒപ്പം കിച്ച സുദീപ്, വിജയ് സേതുപതി, ജഗപതി ബാബു, അമിതാബ് ബച്ചൻ, നയൻതാര, തമന്ന, അനുഷ്ക ഷെട്ടി എന്നിവരും ഈ ബ്രഹ്മാണ്ഡ ചിത്രത്തിന്റെ താര നിരയിൽ ഉണ്ട്. ഇതിന്റെ പ്രീ റിലീസ് പ്രമോഷന് വേണ്ടി രണ്ടു ദിവസം മുൻപാണ് ചിരഞ്ജീവി കൊച്ചിയിൽ എത്തിച്ചേർന്നത്.