പ്രേക്ഷകർ ഒന്നടങ്കം പറയുന്നു ഇത് പുതിയ അനുഭവം; രണ്ടാം വാരത്തിലും കുതിപ്പ് തുടർന്ന് സ്വാതന്ത്രം അർദ്ധരാത്രിയിൽ..

ഈസ്റ്റർ റിലീസായി പുറത്തുവന്ന സ്വാതന്ത്ര്യം അർദ്ധരാത്രിയിൽ വൻ പ്രേക്ഷക പിന്തുണ നേടിക്കൊണ്ട് കുതിപ്പ് തുടരുകയാണ്. നവാഗതനായ ടിനു പാപ്പച്ചൻ സംവിധാനം ചെയ്ത ചിത്രം പ്രേക്ഷകർക്ക് പുത്തൻ അനുഭവമായി മാറിയിരിക്കുന്നു. ജയിൽ പശ്ചാത്തലമാക്കി മലയാളത്തിൽ ഇന്നേവരെ ഒരുങ്ങിയ ചിത്രങ്ങളിൽ നിന്നുമെല്ലാം വ്യത്യസ്തമായിരുന്നു സ്വാതന്ത്ര്യം അർദ്ധരാത്രിയിൽ ചിത്രം. മലയാളത്തിൽ ഇന്നേവരെ കാണാത്ത ദൃശ്യാവിഷ്കരണം കൊണ്ടും പ്രേക്ഷകരെ ത്രില്ലടിപ്പിക്കുന്ന കഥാമുഹൂർത്തങ്ങൾ കൊണ്ടും ചിത്രം ഒരു പുത്തൻ അനുഭവം തീർത്തിരിക്കുകയാണ്. ആദ്യ ദിവസങ്ങളിൽ യുവാക്കളായിരുന്നു ചിത്രം ഏറ്റെടുത്തതെങ്കിൽ പിന്നീട് കുടുംബപ്രേക്ഷകരും ചിത്രത്തെ വലിയ രീതിയിൽ സ്വീകരിച്ചു. ചിത്രം ഇതുവരെ അഞ്ച് കോടിയോളം കളക്ഷനുമായി തകർത്തു മുന്നേറുകയാണ്.

ടിനു പാപ്പച്ചൻ സംവിധാനം ചെയ്ത ഈ ചിത്രത്തിൽ ആന്റണി വർഗ്ഗീസ് ആണ് നായകനായ ജേക്കബ് എന്ന കഥാപാത്രത്തെ അവതരിപ്പിക്കുന്നത്. ഒരു സ്വകാര്യ ധനകാര്യ സ്ഥാപനത്തിലെ ജീവനക്കാരനായ ജേക്കബ് ചില പ്രശ്നങ്ങളെത്തുടർന്ന് ജയിലിൽ ആകുന്നതാണ് ചിത്രത്തിന്റെ പ്രധാന ഇതിവൃത്തം. ചിത്രത്തിൽ ആൻറണി വർഗീസിനൊപ്പം വിനായകൻ, ചെമ്പൻ വിനോദ്, ടിറ്റോ വിൽസൺ തുടങ്ങിയവരും മറ്റു പ്രധാന കഥാപാത്രങ്ങൾ ആയി എത്തുന്നു. നവാഗതനായ ദിലീപ് കുര്യനാണ് ചിത്രത്തിന്റെ രചന നിർവഹിച്ചിരിക്കുന്നത്. മലയാളികൾക്ക് വ്യത്യസ്ത അനുഭവം തീർത്ത ചിത്രത്തിൻറെ ഛായാഗ്രഹണം നിർവഹിച്ചിരിക്കുന്നത് ഗിരീഷ് ഗംഗാധരൻ ഗംഗാധരനാണ്. 80 ശതമാനത്തോളം ജയിലിൽ ചിത്രീകരിച്ച സ്വാതന്ത്ര്യം അർദ്ധരാത്രിയിൽ നിർമ്മിച്ചിരിക്കുന്നത് ബി. സി. ജോഷിയാണ്. സംവിധായകനായ ബി ഉണ്ണികൃഷ്ണനാണ് ചിത്രം വിതരണത്തിനെത്തിച്ചിരിക്കുന്നത്. മികച്ച പ്രേക്ഷക പ്രതികരണവുമായി ചിത്രം രണ്ടാം വാരവും കുതിപ്പ് തുടരുന്നു.