റെക്കോർഡുകൾ കടപുഴക്കാൻ കങ്കുവ; കേരളത്തിൽ തരംഗമായി വീണ്ടും സൂര്യ

തമിഴകത്തിന്റെ നടിപ്പിൻ നായകൻ സൂര്യയുടെ കരിയറിലെ ഏറ്റവും വലിയ ചിത്രമായ കങ്കുവ നവംബർ പതിനാലിന് ആഗോള റിലീസായി എത്തുകയാണ്. കേരളത്തിലും സൂര്യയുടെ കരിയറിലെ ഏറ്റവും വലിയ റിലീസായി എത്തുന്ന ചിത്രം അദ്ദേഹത്തിന്റെ കരിയർ ബെസ്റ്റ് ഓപ്പണിങ് ആണ് കേരളത്തിൽ ലക്ഷ്യമിടുന്നത്. ഇതിനോടകം 2 കോടിക്ക് മുകളിൽ കേരളത്തിൽ പ്രീ സെയിൽസ് വന്ന ചിത്രത്തിന് ഫൈനൽ പ്രീ സെയിൽസ് 3 കോടിയോളം വരുമെന്നാണ് പ്രതീക്ഷിക്കപ്പെടുന്നത്.

350 കോടി മുതൽ മുടക്കിൽ ഒരുക്കിയ ഈ പീരീഡ് ആക്ഷൻ ഡ്രാമ ചിത്രം പത്തോളം ഭാഷകളിൽ ലോകം മുഴുവൻ പതിനായിരത്തിലധികം സ്‌ക്രീനുകളിലാണ് എത്തുക. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ കേരളത്തിൽ വിതരണം ചെയ്യുന്ന ചിത്രം അഞ്ഞൂറോളം സ്ക്രീനുകൾ ഉറപ്പിച്ചു കഴിഞ്ഞു. ഡ്രീം ബിഗ് ഫിലിംസ് ആണ് ചിത്രത്തിന്റെ കേരളത്തിലെ ഡിസ്ട്രിബൂഷൻ പാർട്ണർ.

സ്റ്റുഡിയോ ഗ്രീനിന്‍റെ ബാനറിൽ കെ ഇ ജ്ഞാനവേൽ രാജ, ജി ധനഞ്ജയൻ , യു വി ക്രിയേഷൻസിന്റെ ബാനറിൽ വംശി പ്രമോദ് എന്നിവർ ചേർന്നാണ് കങ്കുവ നിർമ്മിക്കുന്നത്. ശിവയുടെ സംവിധാനത്തിലെത്തുന്ന ചിത്രത്തിൽ ഇരട്ട വേഷത്തിലാണ് സൂര്യ എത്തുന്നത്. കേരളത്തിൽ ഈ ചിത്രം ആദ്യ ദിനം 2000 ഷോകൾക്ക് മുകളിൽ കളിക്കും എന്ന് ഉറപ്പായിക്കഴിഞ്ഞു. ആദ്യ ദിന കളക്ഷനിൽ ചിത്രം റെക്കോർഡ് ഇടുമോ എന്നറിയാനുള്ള ആകാംക്ഷയിലാണ് പ്രേക്ഷകർ.

രണ്ട് കാലഘട്ടങ്ങളിലായി കഥ പറയുന്ന ചിത്രത്തിൽ ബോളിവുഡ് താരം ബോബി ഡിയോൾ വില്ലനായി എത്തുമ്പോൾ, നായികയായി എത്തുന്നത് ദിശ പട്ടാണിയാണ്. യോഗി ബാബു, പ്രകാശ് രാജ്, കെ എസ് രവികുമാർ, ജഗപതി ബാബു, ഹാരിഷ് ഉത്തമൻ, നടരാജൻ സുബ്രമണ്യം, ആനന്ദ് രാജ്, വസുന്ധര കശ്യപ്, റെഡിന് കിങ്‌സ്‌ലി, കോവൈ സരള എന്നിവരാണ് ചിത്രത്തിലെ മറ്റു താരങ്ങൾ