ആദ്യം പേരൻപ്, പിന്നെ യാത്ര; മമ്മൂട്ടിയുടെ പ്രകടനത്തിൽ അത്ഭുതപ്പെട്ടു സൂര്യ..!

ഇന്ത്യൻ സിനിമയുടെ അഭിമാനം മലയത്തിന്റെ സ്വന്തം മെഗാസ്റ്റാർ ഏവരുടെയും പ്രശംസ ഏറ്റു വാങ്ങിക്കൊണ്ടിരിക്കുകയാണ്. ഒരാഴ്ച വ്യത്യാസത്തിൽ റിലീസ് ചെയ്ത അദ്ദേഹത്തിന്റെ രണ്ടു ചിത്രങ്ങൾ ഇപ്പോൾ പ്രേക്ഷകരെയും നിരൂപകരെയും ഒരുപോലെ തൃപ്തിപ്പെടുത്തിയാണ് മുന്നേറുന്നത്. ബോക്സ് ഓഫീസിലെ വിജയത്തേക്കാൾ ഉപരി ഈ ചിത്രങ്ങൾ ശ്രദ്ധിക്കപ്പെടുന്നത് ഇതിലെ മമ്മൂട്ടിയുടെ ഗംഭീര പ്രകടനം കൊണ്ടാണ് എന്ന് പറയേണ്ടി വരും. ഒരു താരം എന്ന നിലയിൽ അല്ലാതെ ഒരു നടനെന്ന നിലയിൽ മമ്മൂട്ടി പ്രേക്ഷകരോട് സംവദിക്കുന്ന കാഴ്ച ഒരുപാട് നാളുകൾക്കു ശേഷമാണ് കാണാൻ കഴിയുന്നത്. ഇപ്പോഴിതാ ഇത്ര വ്യത്യസ്തമായ സിനിമകൾ തിരഞ്ഞെടുത്തു അഭിനയിക്കുന്ന മമ്മൂട്ടിയുടെ പ്രകടനത്തിൽ മയങ്ങി അദ്ദേഹത്തിന് അഭിനന്ദനവുമായി എത്തിയിരിക്കുന്നത് തമിഴകത്തിന്റെ നടിപ്പിൻ നായകനായ സൂര്യ ശിവകുമാർ ആണ്.

തന്റെ ട്വിറ്റെർ അക്കൗണ്ടിലൂടെയാണ് അദ്ദേഹം മമ്മൂട്ടിക്കും മേൽ പറഞ്ഞ രണ്ടു ചിത്രങ്ങളുടെ അണിയറ പ്രവർത്തകർക്കും ആശംസകൾ നേർന്നത്. സിനിമ എന്ന കലാരൂപത്തെ ഏറ്റവും സത്യസന്ധമായി സമീപിച്ചതിനും ഇത്ര മികച്ച ചിത്രങ്ങൾ നമ്മുക്ക് സമ്മാനിച്ചതിനുമാണ് അദ്ദേഹം അണിയറ പ്രവർത്തകർക്ക് അഭിനന്ദനം നേരുന്നതും അവരോടു നന്ദി പ്രകാശിപ്പിക്കുന്നതും. റാം സംവിധാനം ചെയ്ത പേരന്പ് എന്ന തമിഴ് ചിത്രം മമ്മൂട്ടിയുടേയും സാധന എന്ന നടിയുടേയും മികച്ച  പ്രകടനം കൊണ്ട് ശ്രദ്ധ നേടുമ്പോൾ യാത്ര എന്ന തെലുങ്കു ചിത്രം വൈ എസ് രാജശേഖര  റെഡ്ഢിയുടെ പദയാത്രയുടെ പുനരാവിഷ്കാരം എന്ന നിലയിൽ ആണ് വമ്പൻ ജനശ്രദ്ധ നേടുന്നത്. നേരത്തെ ഈ ചിത്രത്തിൽ വൈ എസ് ആറിന്റെ മകൻ ജഗൻ മോഹൻ റെഡ്ഢി ആയി സൂര്യ എത്തും എന്ന് വാർത്തകൾ ഉണ്ടായിരുന്നു. ജഗൻ മോഹൻ റെഡി ആയി വളരെ അടുത്ത സുഹൃത് ബന്ധം പുലർത്തുന്ന ആളാണ് സൂര്യ.