വിമാനത്തിനുള്ളിൽ ഒരുങ്ങുന്ന വമ്പൻ സംഘട്ടനം; സൂര്യ- ശിവ ചിത്രം അവസാന ഘട്ടത്തിലേക്ക്

തമിഴകത്തിന്റെ നടിപ്പിൻ നായകൻ സൂര്യയെ നായകനാക്കി സൂപ്പർഹിറ്റ് സംവിധായകൻ ശിവ ഒരുക്കുന്ന ബ്രഹ്മാണ്ഡ ചിത്രത്തിന്റെ ഷൂട്ടിംഗ് പുരോഗമിക്കുകയാണ്. സൂര്യ 42 എന്ന് താത്കാലികമായി പേരിട്ടിരിക്കുന്ന ഈ ചിത്രത്തിന്റെ പുതിയ ഷെഡ്യൂളിനെ കുറിച്ചുള്ള അപ്‌ഡേറ്റുകളാണ് ഇപ്പോൾ പുറത്ത് വരുന്നത്. ചെന്നൈ, ഇവിപിയിൽ ആണ് ഈ ചിത്രത്തിന്റെ പുത്തൻ ഷെഡ്യൂൾ ആരംഭിക്കുന്നത്. രണ്ടാഴ്ചയോളം നീണ്ടു നിൽക്കുന്ന ഈ ഷെഡ്യൂളിൽ ഒരു വമ്പൻ ആക്ഷൻ രംഗവും ഒരു ഗാനവുമാണ് ഒരുക്കുക. വിമാനത്തിനുള്ളിൽ വെച്ചുള്ള ഒരു ഗംഭീര ആക്ഷൻ രംഗമൊരുക്കാൻ വലിയ സെറ്റാണ് ഇവിടെ നിർമ്മിച്ചിരിക്കുന്നത്. ത്രീഡിയിൽ ഒരുക്കുന്ന ഒരു പീരീഡ് ഡ്രാമ കൂടിയാണ് ഈ ചിത്രം. ആയിരം വർഷങ്ങൾക്ക് മുൻപുള്ള കഥ പറയുന്ന ഈ ചിത്രത്തിൽ ഒരു യോദ്ധാവായാണ് സൂര്യ വേഷമിടുന്നതെന്നാണ് സൂചന. വീർ എന്നാണ് സൂര്യയുടെ ഈ പുതിയ ചിത്രത്തിന് നൽകിയിരിക്കുന്ന പേര് എന്ന് നേരത്തെ ടൈംസ് ഓഫ് ഇന്ത്യ റിപ്പോർട്ട് ചെയ്തിരുന്നു.

ബോളിവുഡ് താരസുന്ദരി ദിശാ പട്ടാണി നായികാ വേഷം ചെയ്യുന്ന ഈ ചിത്രം സൂര്യയുടെ കരിയറിലെ തന്നെ ഏറ്റവും വലിയ ചിത്രമായാണ് ഒരുക്കുന്നത്. പത്ത് ഭാഷകളിൽ റിലീസ് ചെയ്യാൻ പോകുന്ന ഈ ചിത്രം, യു വി ക്രിയേഷന്‍സിന്റെ ബാനറില്‍ വംശി പ്രമോദും സ്റ്റുഡിയോ ഗ്രീനിന്റെ ബാനറില്‍ കെ ഇ ജ്ഞാനവേല്‍രാജയും ചേർന്നാണ് നിർമ്മിക്കുന്നത്. ഇത് രണ്ട് ഭാഗങ്ങൾ ആയാവും എത്തുകയെന്നും വാർത്തകൾ വന്നിരുന്നു. നിഷാദ് യൂസഫ് എഡിറ്റ് ചെയ്യുന്ന ഈ ചിത്രത്തിന് സംഗീതമൊരുക്കുന്നത് ദേവിശ്രീ പ്രസാദ്, ക്യാമറ ചലിപ്പിക്കുന്നത് വെട്രി പളനിസ്വാമി എന്നിവരാണ്. മൃണാൾ താക്കൂറും ഇതിൽ നായികയായി ജോയിൻ ചെയ്തു എന്നുള്ള വാർത്തകളും അടുത്തിടെ വന്നിരുന്നു.