ആനക്കാട്ടിൽ ചാക്കോച്ചിയിലൂടെ വമ്പൻ തിരിച്ചു വരവ് നടത്താൻ സുരേഷ് ഗോപി; ലേലം 2 ഷൂട്ടിംഗ് ആരംഭിക്കുന്നു…

മലയാളത്തിലെ ഏറ്റവും വലിയ മാസ്സ് കഥാപാത്രങ്ങളിലൊന്നായ ആനക്കാട്ടിൽ ചാക്കോച്ചി വമ്പൻ തിരിച്ചു വരവിന് ഒരുങ്ങുകയാണ്. ചിത്രത്തിലൂടെ കരിയറിലെ ഏറ്റവും വലിയ ചിത്രത്തിനായി ഒരുങ്ങുകയാണ് സുരേഷ് ഗോപിയും. കസബ എന്ന ആദ്യ ചിത്രത്തിലൂടെ തന്നെ ശ്രദ്ധേയനായ രഞ്ജി പണിക്കരുടെ മകൻ നിതിൻ രഞ്ജി പണിക്കർ ചിത്രം സംവിധാനം ചെയ്യും. ലേലത്തിൽ തീപാറും സംഭാഷണങ്ങൾ ഒരുക്കിയ രഞ്ജി പണിക്കർ തന്നെയാവും ചിത്രത്തിന് വേണ്ടിയും തൂലിക ചലിപ്പിക്കുന്നത്. രഞ്ജി പണിക്കർ ആണ് ചിത്രം നിർമ്മിക്കുന്നത് ഒരു കാലത്തു മലയാളത്തിലെ ഏറ്റവും വലിയ പണം വാരി ചിത്രം അത് വീണ്ടും എത്തുമ്പോൾ ആരാധകരും ആവേശത്തിലാണ്. ചിത്രത്തിന്റെ കാസ്റ്റിംഗ് കോൾ കഴിഞ്ഞ ദിവസം പുറത്തുവിട്ടിരുന്നു. ചിത്രത്തിന്റെ ചിത്രീകരണം ഉടൻ ആരംഭിക്കും എന്നാണ് അറിയാൻ കഴിയുന്നത്.

1997 ൽ പുറത്തിറങ്ങിയ ലേലം 90 കളിലെ തന്നെ ഏറ്റവും വലിയ പണം വാരി ചിത്രമായി മാറിയിരുന്നു. ജോഷിയായിരുന്നു ആദ്യ ചിത്രം സംവിധാനം ചെയ്തത്. മാസ്സ് ആക്ഷൻ ത്രില്ലറായി ഒരുക്കിയ ചിത്രം തീയറ്ററുകളിൽ തകർത്തു മുന്നേറിയിരുന്നു. ചിത്രത്തിന്റെ തമിഴ് പതിപ്പ് വരെ വലിയ ഹിറ്റായി മാറിയിരുന്നു. ഈയിടെ പുറത്തിറങ്ങിയ ഒരായിരം കിനാവുകൾ എന്ന ചിത്രമാണ് രഞ്ജി പണിക്കർ അവസാനമായി നിർമ്മിച്ച ചിത്രം. കിംഗ് ആൻഡ് കമ്മീഷണറാണ് രഞ്ജി പണിക്കർ അവസാനമായി തിരക്കഥയെഴുതിയ ചിത്രം. കുറച്ചു നാളുകളായി മലയാള സിനിമയിൽ നിന്ന് മാറി നിന്ന സുരേഷ് ഗോപിക്കും ചിത്രം വലിയൊരു തിരിച്ചു വരവാകും എന്ന് കരുതുന്നു.