തെങ്കാശിപട്ടണത്തിനു ശേഷം വീണ്ടും സുരേഷ് ഗോപിയും ലാലും; നിതിൻ രഞ്ജി പണിക്കർ ചിത്രം ടൈറ്റിൽ പോസ്റ്റർ എത്തി..!

കസബ എന്ന മമ്മൂട്ടി ചിത്രത്തിന് ശേഷം രഞ്ജി പണിക്കരുടെ മകൻ ആയ നിതിൻ രഞ്ജി പണിക്കർ ഒരുക്കുന്ന ചിത്രത്തിൽ സുരേഷ് ഗോപി നായകൻ ആവും. സുരേഷ് ഗോപിയോടൊപ്പം ലാലും ഒരു പ്രധാന വേഷം ചെയ്യുന്ന ഈ ചിത്രത്തിന്റെ ടൈറ്റിൽ പോസ്റ്റർ ഇന്ന് മനോരമ പേപ്പറിന് ഒപ്പം ജനങ്ങളുടെ മുന്നിൽ എത്തി. കാവൽ എന്നാണ് ഈ ചിത്രത്തിന് നൽകിയിരിക്കുന്ന പേര്. തെങ്കാശിപ്പട്ടണം എന്ന ബ്ലോക്ക്ബസ്റ്റർ ചിത്രത്തിന് ശേഷം സുരേഷ് ഗോപിയും ലാലും അധികം ഒരുമിച്ചു എത്തിയിട്ടില്ല. ഈ കൂട്ടുകെട്ട് വീണ്ടും ഒരുമിക്കുന്ന ചിത്രമാകും കാവൽ. ഹൈറേഞ്ചിൽ നടക്കുന്ന ഈ ചിത്രം രണ്ടു കാലഘട്ടങ്ങളുടെ കഥയാണ് പറയുന്നത്.

അതുകൊണ്ടു തന്നെ രണ്ടു വ്യത്യസ്ത ഗെറ്റപ്പിൽ ആവും സുരേഷ് ഗോപി ഈ ചിത്രത്തിൽ എത്തുക. സംവിധായകൻ നിതിൻ രഞ്ജി പണിക്കർ തന്നെ തിരക്കഥയും ഒരുക്കിയ ഈ ചിത്രം ഗുഡ് വിൽ എന്റെർറ്റൈന്മെന്റിന്റെ ബാനറിൽ ജോബി ജോർജ് ആണ് നിർമ്മിക്കുക. സുരേഷ് ഗോപിയെ പ്രേക്ഷകർ കാണാൻ ഇഷ്ട്ടപെടുന്ന രീതിയിൽ ആവും ഈ ചിത്രത്തിൽ അവതരിപ്പിക്കുക എന്നും നിതിൻ രഞ്ജി പണിക്കർ പറയുന്നു. ലേലം രണ്ടാം ഭാഗം ആണ് ചെയ്യാനിരുന്നത് എങ്കിലും തിരക്കഥ എഴുതുന്ന രഞ്ജി പണിക്കരുടെ തിരക്കുകൾ മൂലം അത് നീണ്ടു പോയപ്പോൾ ആണ് ഈ പ്രോജെക്ടിലേക്കു എത്തിയത് എന്നും നിതിൻ പറഞ്ഞു.

സായ ഡേവിഡ്, ഐ എം വിജയൻ, അലെൻസിയർ, പദ്മരാജ് രതീഷ്, സുജിത് ശങ്കർ, സന്തോഷ് കീഴ്ക്കാട്ടൂർ, കിച്ചു ടെല്ലസ്, ബിനു പപ്പു, മോഹൻ ജോസ്, കണ്ണൻ രാജൻ പി ദേവ്, മുരുകൻ, മുത്തുമണി എന്നിവരാണ് ഈ ചിത്രത്തിലെ മറ്റു അഭിനേതാക്കൾ. നിഖിൽ എസ് പ്രവീൺ ഛായാഗ്രഹണം ഒരുക്കുന്ന ഈ ചിത്രത്തിന് വേണ്ടി സംഗീതം നൽകുന്നത് രെഞ്ജിൻ രാജ് ആണ്. മൻസൂർ മൂത്തൂട്ടി ആണ് ഇതിന്റെ എഡിറ്റർ. അനൂപ് സത്യൻ സംവിധാനം ചെയ്യുന്ന ചിത്രം പൂർത്തിയാക്കിയതിനു ശേഷം സുരേഷ് ഗോപി കാവലിൽ ജോയിൻ ചെയ്യും.