വികൃതിയെ നെഞ്ചിലേറ്റിയ പ്രേക്ഷകർക്ക് നന്ദി പറഞ്ഞു കാനഡയിൽ നിന്ന് സുരാജ് വെഞ്ഞാറമൂട്..!

സുരാജ് വെഞ്ഞാറമ്മൂട് നായകനായി എത്തിയ വികൃതി എന്ന ചിത്രം മികച്ച വിജയം ആണ് നേടിയെടുത്തത്. പ്രേക്ഷകരും നിരൂപകരും ഒരുപോലെ പ്രശംസ ചൊരിഞ്ഞ ഈ ചിത്രം ഒരു യഥാർത്ഥ സംഭവ കഥയെ ആസ്പദമാക്കിയാണ് ഒരുക്കിയത്. നവാഗതനായ എം സി ജോസഫ് സംവിധാനം ചെയ്ത ഈ ചിത്രം രചിച്ചത് അജീഷ് പി തോമസ് ആണ്. സൗബിൻ ഷാഹിറും പ്രധാന വേഷത്തിൽ എത്തിയ ഈ ചിത്രത്തിൽ സംസാര ശേഷിയും കേൾവി ശ്കതിയും ഇല്ലാത്ത കഥാപാത്രമായി ഗംഭീര പ്രകടനമാണ് സുരാജ് കാഴ്ച വെച്ചത്. ഇപ്പോഴിതാ ഈ സിനിമയെ നെഞ്ചോടു ചേർത്ത് നിർത്തി വലിയ വിജയമാക്കി മാറ്റിയ പ്രേക്ഷകരോട് നന്ദി പറയുകയാണ് സുരാജ്.

ഇപ്പോൾ കാനഡയിൽ ഉള്ള അദ്ദേഹം ഫേസ്ബുക് ലൈവിൽ വന്നാണ് പ്രേക്ഷകരോട് ഉള്ള നന്ദി അറിയിച്ചത്. സോഷ്യൽ മീഡിയ ഉപയോഗിക്കുന്നവർ എന്തായാലും കണ്ടിരിക്കേണ്ട ഒരു വിഷയം ആണ് ഈ ചിത്രം പറയുന്നത് എന്നും സുരാജ് പറയുന്നു. ഈ ചിത്രം കാണാത്തവർ ഉണ്ടെങ്കിൽ തീയേറ്ററിൽ തന്നെ പോയി കാണണം എന്നും സുരാജ് പറഞ്ഞു. ഈ ചിത്രം കണ്ടു ഒരുപാട് ആളുകൾ മികച്ച പ്രതികരണവും പ്രശംസയും നൽകി എന്നും അവരോടൊക്കെ വലിയ നന്ദി അറിയിക്കുന്നു എന്നും സുരാജ് പറയുന്നു. സുരാജ് അവതരിപ്പിച്ചത് ഇപ്പോൾ ജീവിച്ചിരിക്കുന്ന അങ്കമാലി സ്വദേശി ആയ എൽദോ എന്ന ആളുടെ കഥാപാത്രത്തെ ആണ്. അയാളുടെ ജീവിതത്തിൽ ഉണ്ടായ ഒരു ട്രാജഡി ആണ് ഈ ചിത്രത്തിന്റെ വിഷയം. എ ഡി ശ്രീകുമാർ, ഗണേഷ് മേനോൻ, ലക്ഷ്മി വാര്യർ എന്നിവർ ചേർന്ന് കട്ട് റ്റു ക്രിയേറ്റ് പിക്‌ചേഴ്‌സിന്റെ ബാനെറിൽ ആണ് വികൃതി നിർമിച്ചിരിക്കുന്നത്.