എക്സ്ട്രാ ഡീസന്റ് ആയ ബിനു; നിർമ്മാതാവ് കൂടിയായ പുതിയ ചിത്രത്തെ കുറിച്ച് കൂടുതൽ വെളിപ്പെടുത്തി സുരാജ് വെഞ്ഞാറമ്മൂട്

ആമിർ പള്ളിക്കലിന്റെ സംവിധാനത്തിൽ സുരാജ് വെഞ്ഞാറമ്മൂട് നായകനും നിർമാതാവുമായെത്തുന്ന ചിത്രം ‘എക്സ്ട്രാ ഡീസന്റ്’ (ഇ ഡി) ഡിസംബർ 20 ന് ആണ് റിലീസ് ചെയ്യാൻ പോകുന്നത്. ലിസ്റ്റിൻ സ്റ്റീഫന്റെ മാജിക് ഫ്രെയിംസും സുരാജ് വെഞ്ഞാറമ്മൂടിന്റെ വിലാസിനി സിനിമാസും ചേർന്ന് നിർമ്മിച്ച ഈ ചിത്രം ആഷിഫ് കക്കോടിയാണ് രചിച്ചത്.

ഇപ്പോഴിതാ ചിത്രത്തെ കുറിച്ചും, ഇതിലെ തന്റെ കഥാപാത്രത്തെ കുറിച്ചും മനസ്സ് തുറക്കുകയാണ് സുരാജ് വെഞ്ഞാറമൂട്. ബിനു എന്ന കഥാപാത്രത്തിന് ആണ് സുരാജ് വെഞ്ഞാറമൂട് ഈ ചിത്രത്തിൽ ജീവൻ പകരുന്നത്. ബിനു എക്ട്രാ ഡീസന്റ് ആണെന്നും എല്ലാ വീട്ടിലും ഒരു ബിനു കാണും എന്ന് സുരാജ് പറയുന്നു. വീട്ടിനകത്തിരിക്കുന്ന നമ്മളല്ലല്ലോ പുറത്തിറങ്ങുമ്പോള്‍ എന്നും സുരാജ് ഓർമിപ്പിക്കുന്നുണ്ട്. ആരെങ്കിലും വന്ന് കോളിങ്ങ് ബെല്‍ അടിച്ചാൽ ഉടൻ നമ്മൾ അഭിനയം തുടങ്ങുമെന്നും ഈ സിനിമ കാണുമ്പോള്‍ ബിനുവിനെ കുറിച്ചു ഇങ്ങനെയും ആള്‍ക്കാരുണ്ടോ എന്ന് ചിന്തിക്കുന്ന വളരെ കുറച്ച് കുടുംബങ്ങളേ കാണൂ എന്നും സുരാജ് കൂട്ടിച്ചേർത്തു.

ഇതൊരു ചെറിയ സിനിമയാണ് എന്നും സുരാജ് ഉള്‍പ്പടെയുള്ള അഭിനേതാക്കളുടെ ഇതിലെ പെര്‍ഫോമന്‍സ് അതിഗംഭീരമാണ് എന്ന് നിർമ്മാതാക്കളിൽ ഒരാളായ ലിസ്റ്റിൻ സ്റ്റീഫനും സാക്ഷ്യപ്പെടുത്തുന്നു. സുരാജ് വെഞ്ഞാറമൂട്‌, ഗ്രേസ്‌ ആന്റണി, പ്രേമലു ഫെയിം ശ്യാം മോഹൻ എന്നിവർ പ്രധാന വേഷങ്ങൾ ചെയ്യുന്ന ചിത്രത്തിൽ വിനയപ്രസാദ്‌, റാഫി, സുധീർ കരമന, ദിൽന പ്രശാന്ത്,അലക്‌സാണ്ടർ, ഷാജു ശ്രീധർ,സജിൻ ചെറുകയിൽ,വിനീത് തട്ടിൽ എന്നിവരും നിർണ്ണായക വേഷങ്ങൾ അവതരിപ്പിച്ചിരിക്കുന്നു.

ഷാരോൺ ശ്രീനിവാസ് ഛായാഗ്രഹണം നിർവഹിച്ച ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത് അങ്കിത് മേനോനാണ്. ശ്രീജിത്ത് സാരംഗാണ് ചിത്രത്തിന്റെ എഡിറ്റർ. ചിത്രത്തിന്റെ ട്രൈലെർ, ഗാനങ്ങൾ എന്നിവ സോഷ്യൽ മീഡിയയിൽ സൂപ്പർ ഹിറ്റാണ്.