അന്യന്റെ സ്വകാര്യതയിൽ ഒളിഞ്ഞു നോക്കരുത്; വികൃതിയെ കുറിച്ച് മനസ്സ് തുറന്നു സുരാജ്..!

സുരാജ് വെഞ്ഞാറമ്മൂട് നായക വേഷത്തിൽ എത്തുന്ന വികൃതി എന്ന ചിത്രം നാളെ മുതൽ കേരളത്തിൽ പ്രദർശനം ആരംഭിക്കുകയാണ്. നവാഗതനായ എം സി ജോസെഫ് സംവിധാനം ചെയ്ത ഈ ചിത്രത്തിൽ സൗബിൻ ഷാഹിറും കേന്ദ്ര കഥാപാത്രത്തെ അവതരിപ്പിക്കുന്നു. ഒരു യഥാർത്ഥ സംഭവത്തെയും യഥാർത്ഥ കഥാപാത്രങ്ങളെയും ആസ്പദമാക്കിയാണ് ഈ ചിത്രം ഒരുക്കിയിരിക്കുന്നത്. അജീഷ് പി തോമസ് തിരക്കഥ രചിച്ചിരിക്കുന്ന ഈ ചിത്രം എ ഡി ശ്രീകുമാർ, ഗണേഷ് മേനോൻ, ലക്ഷ്മി വാര്യർ എന്നിവർ ചേർന്ന് കട്ട് റ്റു ക്രിയേറ്റ് പിക്‌ചേഴ്‌സിന്റെ ബാനെറിൽ നിർമ്മിച്ചിരിക്കുന്നു. ഈ ചിത്രത്തെ കുറിച്ച് സുരാജ് വെഞ്ഞാറമ്മൂട് പറയുന്നത് ഓരോ സിനിമാ പ്രേമിയും കണ്ടിരിക്കേണ്ട മനോഹരമായ ഒരു ചിത്രമാണ് വികൃതി എന്നാണ്.

അന്യന്റെ സ്വകാര്യതയിലേക്കു നമ്മൾ ഒളിഞ്ഞു നോക്കരുത് എന്ന സന്ദേശം നൽകുന്ന ഈ ചിത്രം അങ്ങനെ നമ്മൾ കാണിക്കുന്ന വികൃതികൾ മറ്റുള്ളവരുടെ ജീവിതത്തെ എത്രമാത്രം ദോഷകരമായി ബാധിക്കുന്നു എന്നതും തുറന്നു കാണിക്കുന്ന സിനിമയാണ് എന്നും സുരാജ് വിശദീകരിക്കുന്നു. കേൾവി ശ്കതിയും സംസാര ശേഷിയും ഇല്ലാത്ത കഥാപാത്രം ആയി സുരാജ് അഭിനയിക്കുന്ന ഈ ചിത്രം തെറ്റായ പ്രചരണങ്ങൾ കൊണ്ട് ജീവിതത്തിൽ ഒട്ടേറെ ബുദ്ധിമുട്ടുകളിലൂടെ കടന്നു പോയ ഒരാളുടെ റിയൽ ലൈഫ് അനുഭവം ആണ് നമ്മുടെ മുന്നിൽ എത്തിക്കുന്നത്. സുരാജിന്റെ ഭാര്യ ആയി സുരഭി ലക്ഷ്മി എത്തുന്ന ഈ ചിത്രത്തിൽ സുധി കോപ്പ, ജാഫർ ഇടുക്കി, പോളി വത്സൻ എന്നിവരും അഭിനയിക്കുന്നു. രസിപ്പിക്കുന്നതിനൊപ്പം പ്രേക്ഷകരെ ചിന്തിപ്പിക്കുകയും അവരുടെ കണ്ണ് തുറപ്പിക്കുകയും കൂടി ചെയ്യുന്ന ഒരു ചിത്രമാകും വികൃതി എന്നും സുരാജ് സൂചിപ്പിക്കുന്നു.