പതിനായിരം തീയേറ്ററുകളിൽ റിലീസ് ചെയ്യാൻ സൂപ്പർസ്റ്റാർ രജനികാന്തിന്റെ 2.0..!

ഇന്ത്യൻ സിനിമാ പ്രേക്ഷകർ ഏറ്റവും കൂടുതൽ കാത്തിരിക്കുന്ന ചിത്രങ്ങളിൽ ഒന്നാണ് സൂപ്പർസ്റ്റാർ രജനികാന്തും ബോളിവുഡ് സൂപ്പർ താരം അക്ഷയ് കുമാറും പ്രധാന വേഷങ്ങളിൽ എത്തുന്ന 2.0 . ഇന്ത്യൻ സിനിമയിലെ ഷോ മാൻ ആയ ഷങ്കർ ഒരുക്കിയ ഈ ചിത്രം ഈ വർഷം നവംബർ 29 നു ആണ് റിലീസ് ചെയ്യാൻ തീരുമാനിച്ചിരിക്കുന്നത്. ഒന്നിലധികം തവണ റിലീസ് മാറ്റിയ ഈ ചിത്രം ഇന്ത്യൻ സിനിമയിലെ ഏറ്റവും ചെലവേറിയ ചിത്രവുമാണ്. പൂർണ്ണമായും ഐ മാക്സ് ത്രീഡിയിൽ ചിത്രീകരിച്ച ഈ ചിത്രത്തിന്റെ ബജറ്റ് അഞ്ഞൂറ് കോടി രൂപയ്ക്കു മുകളിൽ ആണ്. ഇപ്പോൾ ഇന്ത്യൻ സിനിമയിലെ എക്കാലത്തെയും ഏറ്റവും വലിയ റിലീസ് എന്ന റെക്കോർഡും നേടാൻ തയ്യാറെടുക്കുകയാണ്‌ ഈ ചിത്രം. ലഭ്യമായ റിപ്പോർട്ടുകൾ അനുസരിച്ചു പതിനായിരം തീയേറ്ററുകളിൽ ആയാണ് ഈ ചിത്രം ലോകമെമ്പാടും പ്രദർശനത്തിന് എത്തുക.

ഈ ചിത്രത്തിന്റെ ആദ്യ ടീസർ അടുത്ത മാസം സെപ്റ്റംബർ പതിമൂന്നിന് വിനായക ചതുർഥി ദിനത്തിൽ റിലീസ് ചെയ്യും. തമിഴ്, തെലുങ്ക്, ഹിന്ദി ഭാഷകളിൽ ആയി ആണ് ഈ ചിത്രം റിലീസ് ചെയുന്നത്. അക്ഷയ് കുമാർ വില്ലൻ വേഷത്തിൽ എത്തുന്ന ഈ ചിത്രത്തിൽ അമി ജാക്സൺ ആണ് നായികാ വേഷം ചെയ്തിരിക്കുന്നത്. ആദിൽ ഹുസ്സൈൻ, സുധാൻഷു ദേശ്പാണ്ഡെ എന്നിവരും അഭിനയിക്കുന്ന ഈ ചിത്രത്തിൽ മലയാളി നടന്മാരായ കലാഭവൻ ഷാജോണും റിയാസ് ഖാനും ഉണ്ട്. ഹോളിവുഡ് സാങ്കേതിക വിദഗ്‌ധർ അണിയറയിൽ പ്രവർത്തിക്കുന്ന ഈ ചിത്രത്തിന് സംഗീതം നൽകിയിരിക്കുന്നത് എ ആർ റഹ്മാനും ഛായാഗ്രഹണം നിർവഹിച്ചിരിക്കുന്നത് നീരവ് ഷായും ആണ്. ലൈക്ക പ്രൊഡക്ഷൻസ് ആണ് ഈ ബിഗ് ബജറ്റ് ചിത്രത്തിന്റെ നിർമ്മാതാക്കൾ.