അഭിനയ മത്സരത്തിന് അരങ്ങൊരുങ്ങി; ഫഹദും വിജയ് സേതുപതിയും ഒന്നിച്ച സൂപ്പർ ഡീലക്സ് സെക്കന്റ് ലുക്ക് പോസ്റ്റർ എത്തി..!

മലയാളത്തിലെയും തമിഴിലെയും പുതിയ തലമുറയിലെ ഏറ്റവും മികച്ച നടൻമാർ എന്നറിയപ്പെടുന്ന രണ്ടു നടന്മാരാണ് ഫഹദ് ഫാസിലും വിജയ് സേതുപതിയും. ഇരുവരും ആദ്യമായി ഒരുമിച്ചു അഭിനയിച്ച ചിത്രമാണ് സൂപ്പർ ഡീലക്സ്. ഇപ്പോഴിതാ റിലീസിന് ഒരുങ്ങുന്ന ഈ ചിത്രത്തിന്റെ സെക്കന്റ് ലുക്ക് പോസ്റ്ററും എത്തി കഴിഞ്ഞു. ത്യാഗരാജൻ കുമാര രാജ സംവിധാനം ചെയ്ത ഈ ചിത്രത്തിൽ ഇവരെ കൂടാതെ സാമന്ത , രമ്യ കൃഷ്ണൻ, മിസ്കിൻ എന്നിവരും അഭിനയിച്ചിട്ടുണ്ട്. ഒരു ട്രാൻസ്‌ജെൻഡർ ആയാണ് ഈ ചിത്രത്തിൽ വിജയ് സേതുപതി പ്രത്യക്ഷപ്പെടുന്നത് എന്ന പ്രത്യേകതയും ഇതിനുണ്ട്. ട്രാൻസ്ജെൻഡറിന്റെ ഗെറ്റപ്പിൽ സംവിധായകന്റെ നിർദേശം അനുസരിച്ചു നൃത്തം ചെയ്യുന്ന വിജയ് സേതുപതിയുടെ ഒരു വീഡിയോ നേരത്തെ സോഷ്യൽ മീഡിയയിൽ വൈറൽ ആയിരുന്നു.

സംവിധായകൻ തന്നെ രചിച്ച ഈ ചിത്രത്തിന്റെ അഡീഷണൽ സ്ക്രീൻ പ്ളേ ഒരുക്കിയിരിക്കുന്നത് മിസ്കിനും നളൻ കുമാര സാമിയും നീലൻ കെ ശേഖറും ചേർന്നാണ്. പി സി ശ്രീറാം, പി എസ്‌ വിനോദ്, നീരവ് ഷാ എന്നിവർ ചേർന്ന് ദൃശ്യങ്ങൾ ഒരുക്കിയിരിക്കുന്ന ഈ ചിത്രത്തിന് സംഗീതം പകർന്നിരിക്കുന്നത് യുവാൻ ശങ്കർ രാജ ആണ്. സത്യരാജ് നടരാജൻ എഡിറ്റ് ചെയ്യുന്ന ഈ ചിത്രം അധികം വൈകാതെ തന്നെ തീയേറ്ററുകളിൽ എത്തും എന്നാണ് സൂചന. ആദ്യമായാണ് വിജയ് സേതുപതി – സാമന്ത ടീം ഒന്നിക്കുന്നത് എന്നതും ഈ ചിത്രത്തിന്റെ ഒരു ഹൈലൈറ്റ് ആണ്. വേലയ്‌ക്കാരൻ എന്ന മോഹൻ രാജ- ശിവകാർത്തികേയൻ ചിത്രത്തിലെ വില്ലൻ വേഷത്തിലൂടെ തമിഴിൽ അരങ്ങേറിയ ഫഹദ് ഫാസിൽ അഭിനയിച്ച രണ്ടാമത്തെ തമിഴ് ചിത്രമാണ് സൂപ്പർ ഡീലക്സ്.