യുവാക്കൾക്ക് അവസരമൊരുക്കാൻ സണ്ണി വെയ്ൻ… സണ്ണി വെയ്ൻ പ്രൊഡക്ഷൻസ് ആരംഭിക്കുന്നു…

സെക്കൻഡ് ഷോ എന്ന ചിത്രത്തിലൂടെ ദുൽഖർ സൽമാൻ മലയാള സിനിമയിലേക്ക് അരങ്ങേറിയപ്പോൾ അദ്ദേഹത്തിനോടൊപ്പം പ്രേക്ഷക ഹൃദയങ്ങളിലേക്ക് ചേക്കേറിയ നടനാണ് സണ്ണി വെയ്ൻ. ചിത്രത്തിൽ സണ്ണി വെയ്ൻ അവതരിപ്പിച്ച കുരുടി എന്ന കഥാപാത്രം അന്ന് വളരെയേറെ ശ്രദ്ധ നേടിയിരുന്നു. പിന്നീട് നീ. കൊ. ഞാ. ചാ. എന്ന ചിത്രത്തിലൂടെ നായകനായി അരങ്ങേറിയ സണ്ണി മികച്ച അഭിനയ മുഹൂർത്തങ്ങൾ നൽകി പ്രിയങ്കരനായി മാറുകയായിരുന്നു. മിഥുൻ മാനുവൽ തോമസ് ചിത്രം ആൻ മരിയ കലിപ്പിലാണ് എന്ന ചിത്രത്തിലൂടെ വീണ്ടും നായകനായി പ്രേക്ഷകർക്ക് മുൻപിൽ എത്തിയ സണ്ണി ചിത്രത്തിലൂടെ വലിയ വിജയം തീർക്കുകയുണ്ടായി. ചിത്രത്തിന്റെ വിജയം സണ്ണി വെയ്‌നിനെ മലയാളത്തിലെ മുൻനിര നായക താരമാക്കി ഉയർത്തി. ഇപ്പോഴിതാ യുവാക്കൾക്ക് ഒരു സന്തോഷ വാർത്തയുമായാണ് സണ്ണി വെയ്ൻ എത്തിയിരിക്കുന്നത്.

യുവാക്കൾക്കായി അവസരമൊരുക്കാൻ സണ്ണി വെയ്ൻ ഇനി നിർമ്മാണ രംഗത്തേക്ക് കൂടി കടക്കുകയാണ്. സണ്ണി വെയ്ൻ പ്രൊഡക്ഷൻസ് എന്ന പേരിട്ടിരിക്കുന്ന നിർമ്മാണ കമ്പനിയുടെ വിവരങ്ങൾ സണ്ണി തന്നെയാണ് ഫേസ്ബുക്കിലൂടെ ആരാധകരുമായി പങ്കുവച്ചത്. കഴിവുള്ള യുവകലാകാരന്മാർക്ക് വലിയ വേദിയൊരുക്കാൻ ആണ് ഇത്തരം ഒരു പ്ലാറ്റ്ഫോം സണ്ണി വെയ്ൻ ഒരുക്കി നൽകുന്നത്. എന്തായാലും യുവാക്കൾക്കായി സണ്ണി നടത്തുന്ന പ്രവർത്തനത്തിന് വലിയ പിന്തുണയാണ് ആരാധകരും പ്രേക്ഷകരും നല്കികൊണ്ടിരിക്കുന്നത്. പ്രൊഡക്ഷൻ കമ്പനിയുടെ മറ്റ് കൂടുതൽ വിശദവിവരങ്ങൾ പങ്കുവെച്ച് സണ്ണി വരും ദിവസങ്ങളിൽ എത്തുമെന്ന് കരുതാം. നവാഗതനായ മജു ഒരുക്കിയ ഫ്രഞ്ച് വിപ്ലവമാണ് റിലീസിന് ഒരുങ്ങുന്ന സണ്ണി വെയിൻ ചിത്രം.