മോഹൻലാലിന്റെ മരക്കാർ അറബിക്കടലിന്റെ സിംഹത്തിൽ ബോളിവുഡ് താരം സുനിൽ ഷെട്ടിയും; സ്ഥിതീകരിച്ച്‌ താരം..!

പ്രിയദർശന്റെ മോഹൻലാൽ ചിത്രമായ മരക്കാർ അറബിക്കടലിന്റെ സിംഹം വരുന്ന നവംബറിൽ ഷൂട്ടിങ് ആരംഭിക്കും എന്നുള്ള റിപ്പോർട്ടുകൾ ആണ് ഇപ്പോൾ വരുന്നത്. ഹൈദരാബാദിൽ ഇപ്പോൾ സെറ്റ് വർക്കുകൾ നടന്നു വരുന്ന ഈ ചിത്രം നവംബർ ഒന്നിന് തന്നെ ആരംഭിക്കും എന്ന് നിർമ്മാതാവ് ആന്റണി പെരുമ്പാവൂർ പറഞ്ഞിരുന്നു. മോഹൻലാലിന് പുറമെ, പ്രണവ് മോഹൻലാൽ, മധു, പ്രഭു എന്നിവരുടെ ഈ ചിത്രത്തിലെ സാന്നിധ്യം ഒഫീഷ്യൽ ആയി തന്നെ പ്രഖ്യാപിച്ചിരുന്നു. ഇവർക്ക് പുറമെ സുനിൽ ഷെട്ടി, നാഗാർജുന, പരേഷ് റാവൽ എന്നിവരും ഈ ചിത്രത്തിൽ ഉണ്ടാകും എന്ന് വാർത്തകൾ വന്നെങ്കിലും അത് ഒഫീഷ്യൽ ആയി പ്രഖ്യാപിച്ചിരുന്നില്ല.

എന്നാൽ ഈ അടുത്തിടെ നടന്ന ഒരു ചടങ്ങിൽ വെച്ച് താൻ അടുത്തതായി ചെയ്യാൻ പോകുന്ന ചിത്രങ്ങളെ കുറിച്ച് ചോദിച്ചപ്പോൾ സുനിൽ ഷെട്ടി പറഞ്ഞത് പ്രിയദർശൻ ഒരുക്കി മോഹൻലാൽ നായകനായി എത്തുന്ന മരക്കാർ: അറബിക്കടലിന്റെ സിംഹം എന്ന ചിത്രത്തിൽ താൻ അഭിനയിക്കുന്നുണ്ട് എന്നാണ്. സുനിൽ ഷെട്ടി തന്നെ ഇപ്പോൾ ഈ വിവരം സ്ഥിതീകരിച്ചു കഴിഞ്ഞതോടെ ഇനി നാഗാർജുന, പരേഷ് റാവൽ എന്നിവരുടെ ഈ ചിത്രത്തിലെ സാന്നിധ്യവും ഒഫീഷ്യൽ ആയി പുറത്തു വരും എന്ന പ്രതീക്ഷയിൽ ആണ് പ്രേക്ഷകർ.

ഈ ചിത്രത്തിൽ വലിയ താര നിര അണിനിരക്കുമെന്നും, തമിഴ്, തെലുങ്കു, ഹിന്ദി ഭാഷകളിലെ വമ്പന്മാർ അടക്കം ഈ ചിത്രത്തിന്റെ ഭാഗമായി വരുമെന്നും സംവിധായകൻ പ്രിയദർശൻ വാർത്താ സമ്മേളനത്തിൽ പറഞ്ഞിരുന്നു. നൂറു കോടി രൂപ മുതൽമുടക്കിൽ നിർമ്മിക്കുന്ന ഈ ചിത്രം മലയാളത്തിലെ ഏറ്റവും വലിയ പ്രൊജക്റ്റ് ആയാണ് ഒരുക്കുന്നത്. സാബു സിറിൽ പ്രൊജക്റ്റ് ഡിസൈനർ ആയി എത്തുന്ന ഈ ചിത്രത്തിൽ ക്യാമറാമാൻ ആയി തിരു എത്തും എന്നാണ് സൂചന.