ദളപതി വിജയ്‌ക്കൊപ്പം ആക്ഷൻ ചിത്രം; സൂററായ് പോട്രൂ സംവിധായിക പറയുന്നു

പന്ത്രണ്ടു വർഷം മുൻപ് ദ്രോഹി എന്ന തമിഴ് ചിത്രമൊരുക്കി കൊണ്ട് അരങ്ങേറ്റം കുറിച്ച വനിതാ സംവിധായികയാണ് സുധ കൊങ്ങര. എന്നാൽ ഈ സംവിധായിക വലിയ ശ്രദ്ധ നേടിയത് 2016 ഇൽ പുറത്ത് വന്ന ഇരുധി സുട്രു എന്ന ചിത്രത്തിലൂടെയാണ്. 2020 ഇൽ സൂര്യയെ നായകനാക്കി ചെയ്ത സൂററായ് പോട്രൂ എന്ന ചിത്രത്തിലൂടെ ഇവർ ഇന്ത്യ മുഴുവ പ്രശസ്തയായി മാറി. ദേശീയ പുരസ്‌കാരവും ഇതിലൂടെ നേടിയെടുത്ത സുധ കൊങ്ങര, ഇപ്പോൾ ഈ ചിത്രത്തിന്റെ ഹിന്ദി റീമേക്ക് സംവിധാനം ചെയ്യുന്ന തിരക്കിലാണ്. അക്ഷയ് കുമാറാണ് ഇതിലെ നായക വേഷം ചെയ്യുന്നത്. ഇത് കൂടാതെ രണ്ട് ചിത്രങ്ങൾ വേറെയും കമ്മിറ്റ് ചെയ്തിട്ടുണ്ട് ഈ വമ്പൻ സംവിധായിക. അതിലൊന്ന് സൂര്യ നായകനായി എത്തുന്ന ചിത്രവും, മറ്റൊന്ന് കെ ജി എഫ് നിർമ്മാതാക്കളായ ഹോംബാലെ ഫിലിംസിനു വേണ്ടി ചെയ്യാൻ പോകുന്ന ചിത്രവുമാണ്.

ഇപ്പോഴിതാ, ഈയടുത്തിടെ നടന്ന ഒരു പൊതുപരിപാടിയിൽ വെച്ച് ദളപതി വിജയ്‌യെ കുറിച്ച് സുധ കൊങ്ങര പറഞ്ഞ വാക്കുകൾ ഏറെ ശ്രദ്ധ നേടുകയാണ്. താൻ ദളപതി വിജയ്‌യുടെ വലിയ ആരാധികയാണെന്നും, അദ്ദേഹത്തെ വെച്ച് ചിത്രം ചെയ്യാനും ആഗ്രഹമുണ്ടെന്നുമാണ് സുധ കൊങ്ങര പറയുന്നത്. വിജയ് നായകനായ ഒരു ചിത്രം ചെയ്യാനുള്ള അവസരം ലഭിച്ചാൽ, അതിൽ ഒരുപാടു നൃത്തവും മാസ്സ് ആക്ഷൻ സീനുകളും താൻ ഉൾപ്പെടുത്തുമെന്നും സുധ കൊങ്ങര പറയുന്നു. തമിഴിൽ ഏറ്റവും നന്നായി നൃത്തവും ആക്ഷനും ചെയ്യുന്ന നടന്മാരിലൊരാളാണ് ദളപതി വിജയ്. ഇപ്പോൾ വംശി സംവിധാനം ചെയ്യുന്ന വാരിസ് പൂർത്തിയാക്കുന്ന വിജയ് ഇനി ചെയ്യാൻ പോകുന്നത് ലോകേഷ് കനകരാജ് ഒരുക്കാൻ പോകുന്ന പുതിയ ചിത്രമാണ്.