തല്ലുമാലയിലെ തിയേറ്റര്‍ ഫൈറ്റ് പോലെ ഒരെണ്ണം തുണിവിലുമുണ്ട്: സുപ്രീം സുന്ദര്‍

തല്ലുമാലയിലെ വൈറലായ 360 ഡിഗ്രി ആഗ്ലിള്‍ തിയേറ്റര്‍ സംഘട്ടനം പോലെയൊരു സംഘട്ടന രംഗം അജിത്ത് നായകനാകുന്ന തുണിവിലും ഒരുക്കിയിട്ടുണ്ടെന്ന് സുപ്രീം സുന്ദര്‍. സംഘട്ടന രംഗങ്ങള്‍ക്കൊണ്ട് മലയാളത്തില്‍ ശ്രദ്ധനേടിയ ചിത്രമായിരുന്നു ടോവിനോ തോമസ് തകര്‍ത്തഭിനയിച്ച തല്ലുമാല. വെറുതെ നിന്നാലും തല്ലുണ്ടാക്കാന്‍ തോന്നുന്നുവെന്നായിരുന്നു സിനിമ കണ്ടിറങ്ങിയവരുടെ പ്രതികരണം. അത്ര മികച്ചതായിരുന്നു ചിത്രത്തിലെ സംഘട്ടന രംഗങ്ങള്‍. ദേശീയ പുരസ്കാര ജേതാവായ സുപ്രീം സുന്ദറായിരുന്നു ത്രസിപ്പിക്കുന്ന ആ സംഘട്ടന രംഗങ്ങള്‍ക്ക് പിന്നില്‍.

ഇപ്പോഴിതാ അത്തരത്തിലൊരു സംഘട്ടന രംഗം തുണിവിലും ഒരിക്കിയിട്ടുണ്ടെന്ന് വെളിപ്പെടുത്തിയിരിക്കുകയാണ് സുപ്രീം സുന്ദര്‍. നടന്‍ അജിത്തിന്‍റെ ശാരീരിക ക്ഷമത കൂടി നോക്കി ദൈഘ്യം അധികം നീണ്ടു പോകാതെ നോക്കണമെന്ന് സംവിധായകന്‍ എച്ച് വിനോദ് പറഞ്ഞിരുന്നു. അതുകൊണ്ട് 32 സെക്കന്‍റ് നീളമുള്ള ഒരു രംഗമാണ് പ്ലാന്‍ ചെയ്തത്. ആദ്യത്തെ ഒരു മൂന്ന് ടേക്ക് പോയി പ്രാക്ടീസ് പോലെ. പക്ഷേ ടേക്ക് നീണ്ടു പോയപ്പോള്‍ മാറ്റാമെന്ന് സംവിധായന്‍ പറഞ്ഞു. എന്നാല്‍ അജിത്ത് എന്തിനും തയ്യാറായിരുന്നുവെന്നും ഇന്‍ഡ്യഗ്ലിറ്റ്സിന് നല്‍കിയ അഭിമുഖത്തില്‍ സുന്ദര്‍ പറഞ്ഞു.

ആദ്യമായി അജിത്തിനെ കാണുമ്പോള്‍ ഫൈറ്റിനെ കുറിച്ച് സംസാരിക്കണമെന്നൊക്കെ വിചാരിച്ചിരുന്നു എന്നാല്‍ അതൊന്നും നടന്നില്ല. അടുത്ത ദിവസം അദ്ദേഹത്തെ കണ്ടപ്പോള്‍ ഒരു പുതുമുഖത്തോട് പറഞ്ഞു കൊടുക്കുന്നത് പോലെ പറഞ്ഞ തരണമെന്ന് തന്നോട് പറഞ്ഞു. എന്നെക്കൊണ്ട് കഴിയുന്നത്ര ശ്രമിക്കാമെന്നും പറ്റുന്നില്ലെന്ന് തോന്നിയാല്‍ നിര്‍ത്താന്‍ നിങ്ങള്‍ തന്നെ പറയണമെന്നും അജിത്ത് നിര്‍ദേശിച്ചതായും സുന്ദര്‍ പറഞ്ഞു.

തമിഴില്‍ സൂര്യയെ നായകനാക്കി ചിരുതൈ ശിവ സംവിധാനം ചെയ്യുന്ന ചിത്രന്‍റെ സംഘട്ടനം ഒരുക്കുന്നതും സുപ്രീം സുന്ദറാണ്. മലയാളത്തില്‍ മമ്മൂട്ടി ചിത്രം ക്രിസ്റ്റഫറാണ് സുന്ദറിന്‍റെ വരാനിരിക്കുന്ന ചിത്രം.

മലയാളത്തില്‍ ട്രാന്‍സ്, തല്ലുമാല, ഭീഷ്മപര്‍വം എന്നീ ചിത്രങ്ങളില്‍ ഉപയോഗിച്ച റോബോ ക്യാമറ തുണിവിലും ഉപയോഗിക്കുന്നുണ്ട്. ഇതിന്‍റെ ടൈമിങ് മനസിലാക്കാന്‍ വളരെ ബുദ്ധമുട്ടാണ് എന്നാല്‍ ഫൈറ്റേഴസ് ചെയ്യുന്നതെന്താണെന്ന് മനസിലാക്കാന്‍ രണ്ട് മണിക്കൂര്‍ നേരം അജിത്ത് നോക്കി പഠിച്ചുവെന്നും സുന്ദര്‍ പറഞ്ഞു. സൂപ്രീം സുന്ദര്‍ തമിഴ് നടന്‍ അജിത്തിനൊപ്പം ചെയ്യുന്ന ആദ്യത്തെ പടമാണ് തുണിവ്.

അജിത്ത്- എച്ച് വിനോദ് ഒന്നിക്കുന്ന മൂന്നാമത്തെ സിനിമയാണ് തുണിവ്. ചിത്രത്തില്‍ നടി മഞ്ജു വാര്യരും ഒരു ആക്ഷന്‍ വേഷത്തില്‍ വരുന്നുണ്ടെന്ന് നേരത്തെ സംവിധായന്‍ അറിയിച്ചിരുന്നു. ആക്ഷന് ഏറെ പ്രാധാന്യം നല്‍കുന്ന സിനിമ 2023 പൊങ്കല്‍ റിലീസായിട്ടാണ് തിയേറ്ററുകളിലെത്തുക. നേര്‍കൊണ്ട പാര്‍വെ, വലിമൈ എന്നീ സൂപ്പര്‍ ഹിറ്റുകള്‍ക്ക് ശേഷം എച്ച് വിനോദ് അജിത്ത് ഒന്നിക്കുന്ന ചിത്രമാണ തുണിവ്.