സൗബിൻ ഷാഹിർ- ഷൈൻ ടോം ചാക്കോ ഒന്നിക്കുന്ന സോഷ്യൽ ത്രില്ലറുമായി വി കെ പ്രകാശ്; ലൈവ് ടൈറ്റിൽ പോസ്റ്റർ എത്തി

പ്രശസ്ത മലയാള നടനും സംവിധായകനുമായ സൗബിൻ ഷാഹിർ നായകനായി എത്തുന്ന ഏറ്റവും പുതിയ ചിത്രങ്ങളിലൊന്നാണ് ലൈവ്. വി കെ പ്രകാശ് സംവിധാനം ചെയ്യുന്ന ഈ ചിത്രത്തിന്റെ പേര് ലൈവ് എന്നാണ്. ഒരു സോഷ്യൽ ത്രില്ലറായാണ് ഈ ചിത്രം ഒരുക്കുന്നതെന്ന് ഇതിന്റെ ടൈറ്റിൽ പോസ്റ്റർ പങ്ക് വെച്ച് കൊണ്ട് സൗബിൻ ഷാഹിർ സോഷ്യൽ മീഡിയയിൽ കുറിച്ചു. സൗബിൻ ഷാഹിറിനൊപ്പം ഷൈൻ ടോം ചാക്കോ, മംമ്‌ത മോഹൻദാസ്, പ്രിയ പ്രകാശ് വാര്യർ എന്നിവരും ഈ ചിത്രത്തിന്റെ താരനിരയിലുണ്ട്. ഫിലിംസ് 24 എന്ന ബാനറിൽ ദർപ്പൻ ബാങ്കെജ, നിതിൻ കുമാർ എന്നിവർ ചേർന്നാണ് ലൈവ് നിർമ്മിക്കുന്നത്. മംമ്‌ത മോഹൻദാസിന് ജന്മദിനാശംസകൾ നേർന്ന് കൊണ്ട് കൂടിയാണ് ഈ ചിത്രത്തിന്റെ ടൈറ്റിൽ പോസ്റ്റർ സൗബിൻ ഷാഹിർ പുറത്ത് വിട്ടിരിക്കുന്നത്. പ്രശസ്ത രചയിതാവ് എസ് സുരേഷ് ബാബുവാണ് ഈ ചിത്രം രചിച്ചിരിക്കുന്നത്.

നിഖിൽ എസ് പ്രവീൺ ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് സുനിൽ എസ് പിള്ളയാണ്. അൽഫോൻസ് ജോസഫാണ് ഈ ചിത്രത്തിന്റെ സംഗീത സംവിധായകൻ. ദാദ സാഹിബ്, താണ്ഡവം, ഫൈവ് ഫിംഗേഴ്‌സ്, സ്വർണ്ണം, ശിക്കാർ, ദി ഫിലിം സ്റ്റാർ, തിരുവമ്പാടി തമ്പാൻ, നടൻ, ദി റിപ്പോർട്ടർ, സർ സി പി, കനൽ, ജലം, സർവോപരി പാലാക്കാരൻ, എന്നിവ രചിച്ചിട്ടുള്ള ആളാണ് എസ സുരേഷ് ബാബു. മൂന്നാമതൊരാൾ, ബ്യൂട്ടിഫുൾ, ട്രിവാൻഡ്രം ലോഡ്ജ് തുടങ്ങി മുപ്പതോളം ചിത്രങ്ങൾ ഒരുക്കിയ ആളാണ് വി കെ പ്രകാശ്. മലയാളത്തിന് പുറമെ ഹിന്ദി, കന്നഡ ഭാഷകളിലും അദ്ദേഹം ചിത്രങ്ങൾ സംവിധാനം ചെയ്തിട്ടുണ്ട്.