സോഷ്യൽ മീഡിയയിൽ ചിരി പൂരമൊരുക്കുന്ന അൽ അമീൻ ഗ്യാങ് ഇനി ധ്യാൻ ശ്രീനിവാസനൊപ്പം; ഡിറ്റക്റ്റീവ് ഉജ്ജ്വലൻ ഒരുങ്ങുന്നു

സോഷ്യൽl മീഡിയ റീലുകളിലൂടെ പ്രേക്ഷകരെ ഏറെ ചിരിപ്പിക്കുന്ന ഒരു ഗ്യാങ് ആണ് അൽ- അമീൻ ഗ്യാങ്. അമീൻ, നിഹാൽ നിസാം, നിബ്രാസ് നൗഷാദ്, ഷാഹുബാസ് എന്നിവരടങ്ങുന്ന ഈ ഗ്യാങ് ഇപ്പോൾ സിനിമയിലും പ്രേക്ഷകരെ ചിരിപ്പിക്കാൻ എത്തുകയാണ്. ധ്യാൻ ശ്രീനിവാസൻ നായകനായി എത്തുന്ന ഡിറ്റക്റ്റീവ് ഉജ്ജ്വലനിലാണ് ഇവർ നാല് പേരും അരങ്ങേറ്റം കുറിക്കുന്നത് .

സോഫിയ പോൾ നേതൃത്വം നൽകുന്ന വീക്കെൻഡ് ബ്ലോക്ക്ബസ്റ്റേഴ്സ് നിർമിക്കുന്ന ചിത്രമാണ് ‘ഡിറ്റക്റ്റീവ് ഉജ്ജ്വലൻ’. ഇന്ദ്രനീൽ ഗോപീകൃഷ്ണൻ, രാഹുൽ ജി എന്നിവർ ചേർന്ന് രചിച്ച് സംവിധാനം ചെയ്യുന്ന ഈ ചിത്രത്തിൽ ടൈറ്റിൽ റോളാണ് ധ്യാൻ ശ്രീനിവാസൻ ചെയ്യുന്നത്. ശംഭു എന്ന പോലീസ് ഓഫീസർ ആയി സിജു വിത്സനും ചിത്രത്തിന്റെ താരനിരയിലെത്തും. അമീൻ, നിഹാൽ നിസാം, നിബ്രാസ് നൗഷാദ്, ഷാഹുബാസ് എന്നിവരുടെ കാരക്ടർ പോസ്റ്ററും അണിയറ പ്രവർത്തകർ പുറത്ത് വിട്ടിട്ടുണ്ട്.

മിന്നൽ മുരളി എന്ന സൂപ്പർ ഹീറോ ചിത്രത്തിന് ശേഷം വീക്കെൻഡ് സിനിമാറ്റിക് യൂണിവേഴ്സിൽ ഒരുങ്ങുന്ന ചിത്രം കൂടിയാണിത്. ചമൻ ചാക്കോ എഡിറ്റിംഗ് നിർവഹിക്കുന്ന ചിത്രത്തിന് വേണ്ടി സംഗീതമൊരുക്കുന്നത് റമീസ് ആർസീ ആണ്. പ്രേം അക്കാട്ടു, ശ്രയാന്റി എന്നിവർ ചേർന്നാണ് ഈ ബിഗ് ബഡ്ജറ്റ് കോമഡി ത്രില്ലർ ചിത്രത്തിന് കാമറ ചലിപ്പിക്കുന്നത്. ഈ മാസം ആരംഭിക്കുന്ന ചിത്രം അടുത്ത വർഷം പകുതിയോടെ പ്രേക്ഷകരുടെ മുന്നിലെത്തും.