വാലിബർ സംഘത്തിലെ വാലിബൻ; ലിജോ ചിത്രത്തിലെ മോഹൻലാൽ കഥാപാത്രം ഇങ്ങനെയോ?

മലയാളത്തിന്റെ മഹാനടൻ മോഹൻലാലിനെ നായകനാക്കി ലിജോ ജോസ് പെല്ലിശേരി ആദ്യമായി സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് ഇന്നലെ മുതൽ രാജസ്ഥാനിലെ ജയ് സാൽമീറിൽ ആരംഭിച്ചു. പ്രതിഭയും പ്രതിഭാസവും ഒന്നിക്കുന്നു എന്ന വിശേഷണത്തോടെയാണ് സോഷ്യൽ മീഡിയ ഈ കൂട്ടുകെട്ടിനെ നോക്കികാണുന്നത്. ഇന്ത്യൻ സിനിമയുടെ ചരിത്രത്തിലെ തന്നെ ഏറ്റവും മികച്ച നടന്മാരിലൊരാളെ ഇന്നത്തെ തലമുറയിലെ ഏറ്റവും മികച്ച സംവിധായകരിലൊരാൾ ക്യാമറക്കു മുന്നിൽ നിർത്തുമ്പോൾ, ഒരു ഗംഭീര സിനിമാനുഭവം തന്നെയാണ് ഏവരും പ്രതീക്ഷിക്കുന്നതും കാത്തിരിക്കുന്നതും. മലൈക്കോട്ടൈ വാലിബൻ എന്ന് പേരിട്ടിരിക്കുന്ന ഈ ചിത്രം ഗുസ്തിയുടെ പശ്‌ചാത്തലത്തിൽ ആണൊരുക്കുന്നതെന്ന് വാർത്തകൾ വന്നിരുന്നു. അതിനെ ശരി വെക്കുന്ന ചില സൂചനകളാണ് കഴിഞ്ഞ ദിവസം ഈ ചിത്രത്തിന്റെ സെറ്റിൽ നിന്നും വന്ന ചില ചിത്രങ്ങൾ സൂചിപ്പിക്കുന്നത്. ഇതിലെ മോഹൻലാലിന്റെ ഒരു ചിത്രത്തിൽ, അദ്ദേഹത്തിന്റെ പുറകിലുള്ള ഒരു പഴയ വാഹനത്തിൽ മലൈക്കോട്ടൈ വാലിബർ എന്നെഴുതിയിരിക്കുന്നത് കാണാൻ സാധിക്കും.

പരമ്പരാഗതമായി ഗുസ്തി പരിശീലിച്ചു വന്ന ഒരു വാലിബർ സംഘത്തിലെ അംഗമാണ് മോഹൻലാൽ എന്നുള്ള സൂചനയാണ് ഇത് തരുന്നത്. ആ എഴുത്തിനൊപ്പം, പ്രായമുള്ള, ഗുസ്തി വേഷം ധരിച്ച ഒരാളുടെ ചിത്രവും അവ്യക്തമായി കാണാം. പ്രായമായ ഒരു ഗുസ്തിക്കാരന്റെ വേഷമാണ് മോഹൻലാൽ ഇതിൽ ചെയ്യുന്നതെന്ന സൂചനയും ആ ചിത്രം നമ്മുക്ക് തരുന്നുണ്ട്. അതുപോലെ തന്നെ ഈ ലൊക്കേഷൻ ചിത്രങ്ങൾ നമ്മളോട് പറയുന്നത് ഇതൊരു പീരീഡ് ഡ്രാമ ആണെന്ന് കൂടിയാണ്. ലിജോ ജോസ് പെല്ലിശ്ശേരിയുടെ കഥയ്ക്ക് പി എസ് റഫീഖ് തിരക്കഥ രചിച്ച ഈ ചിത്രം ഷിബു ബേബി ജോണിന്റെ ജോൺ മേരി ക്രീയേറ്റീവ്, സെഞ്ച്വറി ഫിലിംസ്, മാക്സ്‌ലാബ് എന്നിവർ ചേർന്നാണ് നിർമ്മിക്കുന്നത്.