വീണ്ടും അഭിനയത്തിലൂടെ കയ്യടി നേടാൻ ഗായകൻ സിദ്ധാർഥ് മേനോൻ; ഇനി ഉത്തരം ഒക്ടോബർ ഏഴിന്

ഒട്ടേറേ ഹിറ്റ് ഗാനങ്ങളിലൂടെ മലയാളി പ്രേക്ഷകരുടെ ശ്രദ്ധ നേടിയ ഗായകനാണ് സിദ്ധാർഥ് മേനോൻ. ആൽബം ഗാനങ്ങൾ, കവർ സോങ്ങുകൾ എന്നിവയിലൂടെ കയ്യടി നേടിയിട്ടുള്ള ഈ ഗായകൻ ഒരു നടനായും ശ്രദ്ധ പിടിച്ചു പറ്റിയിട്ടുള്ള പ്രതിഭയാണ്. നായകനായി വരെ ചിത്രങ്ങൾ ചെയ്തിട്ടുള്ള സിദ്ധാർഥ് മേനോൻ അഭിനയിച്ച് പുറത്ത് വരാൻ പോകുന്ന ഏറ്റവും പുതിയ ചിത്രമാണ് ഇനി ഉത്തരം. അപർണ്ണ ബാലമുരളി പ്രധാന വേഷം ചെയ്ത ഈ ഫാമിലി ത്രില്ലർ ചിത്രത്തിൽ നായകതുല്യമായ ഒരു വേഷമാണ് സിദ്ധാർഥ് ചെയ്തിരിക്കുന്നത്. സിദ്ധാർഥും അപർണയും അഭിനയിച്ച ഈ ചിത്രത്തിലെ ‘മെല്ലെയെന്നെ..’ എന്ന ഗാനം ഇതിനോടകം സൂപ്പർ ഹിറ്റായി മാറിയിട്ടുണ്ട്. റോക്‌സ്‌റ്റാർ എന്ന ചിത്രത്തിലൂടെ നായകനായി എത്തിയ സിദ്ധാർഥ് മേനോൻ പിന്നീട്, സോളോ, കഥ പറഞ്ഞ കഥ, കൂടെ, കോളാമ്പി, ജാൻ എ മൻ എന്നീ ചിത്രങ്ങളിലൂടെയും ശ്രദ്ധ നേടി.

ഇരട്ട തിരക്കഥാകൃത്തുക്കളായ രഞ്ജിത്ത്- ഉണ്ണി ടീം രചിച്ച ഇനി ഉത്തരം, എ&വി എന്റർടൈൻമെന്റിന്റെ ബാനറിൽ വരുൺ, അരുൺ എന്നിവർ ചേർന്നാണ് നിർമ്മിച്ചത്. ഒക്ടോബർ ഏഴിന് പ്രേക്ഷകരുടെ മുന്നിലെത്തുന്ന ഈ ചിത്രം സംവിധാനം ചെയ്തത് സംവിധായകൻ ജീത്തു ജോസഫിന്റെ അസ്സോസിയേറ്റ് ആയി പ്രവർത്തിച്ച സുധീഷ് രാമചന്ദ്രനാണ്. അദ്ദേഹത്തിന്റെ ആദ്യ ചിത്രമാണിത്. അപർണ്ണ, സിദ്ധാർഥ് മേനോൻ എന്നിവരെ കൂടാതെ ജാഫർ ഇടുക്കി, ഹരീഷ് ഉത്തമൻ, കലാഭവൻ ഷാജോൺ, ചന്ദുനാഥ്, ഹരീഷ് ഉത്തമൻ, സിദ്ദീഖ്, ഷാജു ശ്രീധർ, ജയൻ ചേർത്തല, ദിനീഷ് പി, ഭാഗ്യരാജ് എന്നിവരും ഇതിലെ പ്രധാന വേഷങ്ങൾ ചെയ്തിരിക്കുന്നു. ഹിഷാം അബ്ദുൾ വഹാബ് സംഗീതം പകർന്ന ഈ ചിത്രം എഡിറ്റ് ചെയ്തത് ജിതിൻ ഡി കെ, ഇതിനു ക്യാമറ ചലിപ്പിച്ചത് രവിചന്ദ്രൻ എന്നിവരാണ്.