കാടിന്റെ പശ്ചാത്തലത്തിൽ രസിപ്പിക്കാൻ ചാക്കോച്ചന്റെ ശിക്കാരി ശംഭു..!

മലയാളത്തിലെ ബ്രഹ്മാണ്ഡ വിജയം നേടിയ ചിത്രമാണ് മോഹൻലാൽ നായകനായ പുലി മുരുകൻ. 150 കോടി ക്ലബ്ബിൽ ഇടം നേടിയ ഈ ചിത്രം കാടിന്റെ പശ്ചാത്തലത്തിൽ ഒരുങ്ങിയ ഒരു ആക്ഷൻ ചിത്രം ആയിരുന്നു. എന്നാൽ കാടിനും കാടിനടുത്തുള്ള ഒരു ഗ്രാമത്തിന്റെയും പശ്ചാത്തലത്തിൽ ഒരു കോമഡി എന്റെർറ്റൈനെർ മലയാളത്തിൽ ഒരുങ്ങി കഴിഞ്ഞു. കുഞ്ചാക്കോ ബോബൻ നായകനായി എത്തുന്ന ശിക്കാരി ശംഭു ആണ് ആ ചിത്രം.

അധികം വൈകാതെ തന്നെ റിലീസിന് തയ്യാറെടുക്കുന്ന ഈ ചിത്രം സംവിധാനം ചെയ്തിരിക്കുന്നത് പ്രശസ്ത സംവിധായകനായ സുഗീത് ആണ്. കട്ടപ്പനയിലെ ഹൃതിക് റോഷൻ എന്ന ചിത്രത്തിലൂടെ നായകനായി അരങ്ങേറിയ വിഷ്ണു ഉണ്ണികൃഷ്ണനും ഈ ചിത്രത്തിൽ ഒരു പ്രധാന വേഷം ചെയ്യുന്നുണ്ട്. നിഷാദ് കോയ തിരക്കഥ രചിച്ചിരിക്കുന്നു ഈ ചിത്രത്തിൽ വൈൽഡ് ഹണ്ടേഴ്സ് ആയി വേഷം മാറി എത്തുന്ന രണ്ടു കഥാപാത്രങ്ങളെയാണ് കുഞ്ചാക്കോ ബോബനും വിഷ്ണു ഉണ്ണികൃഷ്ണനും അവതരിപ്പിക്കുന്നത് എന്നാണ് സൂചന.

ഇവർക്ക് പുറമെ ശിവദ, അൽഫോൻസാ, കൃഷ്ണ കുമാർ, സലിം കുമാർ, ഹാരിഷ് കണാരൻ, ധർമജൻ, ജോണി ആന്റണി എന്നിവരും ഈ ചിത്രത്തിൽ അഭിനയിക്കുന്നു. ശിക്കാരി ശംഭുവിന്റെ ടീസർ, അതുപോലെ മഴ സോങ് എന്നിവ മികച്ച പ്രേക്ഷക ശ്രദ്ധയാണ് നേടി എടുക്കുന്നത്.

ഏയ്ഞ്ചൽ മരിയ സിനിമയുടെ ബാനറിൽ എസ് കെ ലോറെൻസ് നിർമ്മിച്ചിരിക്കുന്ന ഈ ചിത്രം തമിഴിലേക്കും റീമേക് ചെയ്യുന്നുണ്ട് എന്ന വാർത്തകളും വന്നിരുന്നു. ശ്രീജിത്ത് ഇടവന സംഗീതം നൽകിയിരിക്കുന്ന ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത് ഫൈസൽ അലി ആണ്. ഏതായാലും കാടിന്റെ പശ്‌ചാത്തലത്തിൽ ഒരുങ്ങിയ ഈ രസികൻ ചിത്രം പ്രേക്ഷകർക്ക് ഒരു ചിരി വിരുന്നു തന്നെയാവും സമ്മാനിക്കുക എന്നാണ് റിപ്പോർട്ടുകൾ സൂചിപ്പിക്കുന്നത്.