മുതൽവന് രണ്ടാം ഭാഗവുമായി ഷങ്കർ; നായകൻ ദളപതി വിജയ്..!

എന്തിരൻ 2 എന്ന സൂപ്പർ ഹിറ്റ് ചിത്രം രജനികാന്ത്- അക്ഷയ് കുമാർ ടീമിനെ വെച്ച് ഒരുക്കിയ ഷങ്കർ അതിനു ശേഷം ഇപ്പോൾ കമല ഹാസനെ നായകനാക്കി തന്റെ എക്കാലത്തെയും സൂപ്പർ ഹിറ്റ് ചിത്രമായ ഇന്ത്യന് ഒരു രണ്ടാം ഭാഗം ഒരുക്കുന്നതിന്റെ തിരക്കിൽ ആണ്. ഇപ്പോൾ വരുന്ന റിപ്പോർട്ടുകൾ പറയുന്നത് ഇന്ത്യൻ 2 നു ശേഷം തന്റെ മറ്റൊരു സൂപ്പർ ഹിറ്റിനു രണ്ടാം ഭാഗം ഒരുക്കാനുള്ള തയ്യാറെടുപ്പിൽ ആണ് ഷങ്കർ എന്നാണ്. അർജുൻ, മനീഷ കൊയ്‌രാള എന്നിവർ അഭിനയിച്ച മുതൽവൻ എന്ന ബ്ലോക്ക്ബസ്റ്റർ ചിത്രത്തിന്റെ രണ്ടാം ഭാഗം ആണ് ഷങ്കർ പ്ലാൻ ചെയ്യുന്നത്. എന്നാൽ രണ്ടാം ഭാഗത്തിൽ അർജുന് പകരം ദളപതി വിജയ് ആയിരിക്കും നായകനായി എത്തുന്നത് എന്നാണ് സൂചന.

അഭിനയിക്കുന്നതിനായി ഷങ്കർ ആദ്യം സമീപിച്ചത് സൂപ്പർ സ്റ്റാർ രജനികാന്തിനെ ആയിരുന്നു. എന്നാൽ അദ്ദേഹം അത് നിരസിച്ചു. അതിനു ശേഷം വിജയ് ആയിരുന്നു ഷങ്കറിന്റെ ചോയ്‌സ്. എന്നാൽ വിജയ്‍യും ആ വേഷം നിരസിച്ചപ്പോൾ ആണ് അർജുന് നറുക്കു വീണത്. ഇപ്പോഴിതാ ഒന്നാം ഭാഗത്തിലെ നായക വേഷം നിരസിച്ച വിജയ് അതേ ചിത്രത്തിന്റെ രണ്ടാം ഭാഗത്തിൽ നായകനായി എത്തുമോ എന്നാണ് ഏവർക്കും അറിയേണ്ടത്.ആദ്യത്തെ പോലെ തന്നെ രജനികാന്തിനെ ആണ് ഷങ്കർ ഇത്തവണയും ആദ്യം സമീപിച്ചത് എന്നും എന്നാൽ രജനികാന്ത് സജീവ രാഷ്ട്രീയത്തിലേക്ക് ഇറങ്ങാനുള്ള തീരുമാനം എടുത്തതോടെ ഷങ്കർ അദ്ദേഹത്തെ വിട്ടു വീണ്ടും വിജയ്‌യെ സമീപിച്ചു എന്നുമാണ് റിപ്പോർട്ടുകൾ സൂചിപ്പിക്കുന്നത്.