ഈട എത്തുന്നു നാളെ മുതൽ; ഷെയിൻ നിഗവും നിമിഷയും പ്രധാന വേഷത്തിൽ..!

പ്രശസ്ത എഡിറ്റർ ആയ ബി അജിത് കുമാർ സംവിധായകനായി അരങ്ങേറുന്ന ഈട എന്ന ചിത്രം നാളെ മുതൽ തീയേറ്ററുകളിൽ എത്തുകയാണ്. സംവിധായകൻ തന്നെ തിരക്കഥ രചിച്ചിരിക്കുന്ന ഈ ചിത്രത്തിൽ പ്രധാന വേഷങ്ങളിൽ എത്തിയിരിക്കുന്നത് വളർന്നു വരുന്ന യുവ താരം ആയ ഷെയിൻ നിഗമും തൊണ്ടിമുതലും ദൃക്‌സാക്ഷിയും എന്ന ചിത്രത്തിലൂടെ അരങ്ങേറിയ നടി നിമിഷ സജയനും ആണ്. അടുത്തിടെ അന്തരിച്ചു പോയ മിമിക്രി കലാകാരനും നടനുമായിരുന്ന അബിയുടെ മകൻ ആണ് ഷെയിൻ നിഗം. കിസ്മത്, കെയർ ഓഫ് സൈറ ഭാനു, പറവ എന്നീ ചിത്രങ്ങളിലൂടെ മലയാളി പ്രേക്ഷകർക്കിടയിൽ ഇപ്പോൾ തന്നെ തന്റേതായ ഒരു സ്ഥാനം നേടിയെടുക്കാൻ ഈ യുവ നടന് കഴിഞ്ഞിട്ടുണ്ട്. ഒരു റിയലിസ്റ്റിക് ആയ പ്രണയ കഥയാണ് ഈട പറയുന്നത് എന്നാണ് സൂചന. നോർത്ത് മലബാറിന്റെ രാഷ്ട്രീയ പശ്ചാത്തലം കൂടി ഈ ചിത്രത്തിൽ കേറി വരുന്നുണ്ട് എന്നാണ് ട്രൈലെർ നൽകുന്ന സൂചന.

ഏതായാലും ചിത്രം നാളെ മുതൽ പ്രേക്ഷകരുടെ മുന്നിലേക്ക് എത്തുകയാണ്. ശർമിള രാജ നിർമ്മിച്ച ഈ ചിത്രം എഡിറ്റ് ചെയ്തിരിക്കുന്നത് ബി അജിത് കുമാർ തന്നെയാണ്. സുരഭി ലക്ഷ്മി, അലെൻസിയർ, പി ബാലചന്ദ്രൻ, സുജിത് ശങ്കർ, മണികണ്ഠൻ ആചാരി, സുധി കോപ്പ, രാജേഷ് ശർമ്മ, ഷെല്ലി കിഷോർ, സുനിത സി വി എന്നിവരും ഈ ചിത്രത്തിൽ അഭിനയിക്കുന്നു . ഈടയുടെ ട്രൈലെർ മികച്ച പ്രേക്ഷക പ്രതികരണം നേടി എടുത്തിരുന്നു.