വർഷങ്ങൾക്കു മുൻപേയുള്ള ആഗ്രഹം സഫലമാക്കി ഷെയിൻ നിഗം

യുവ താരം ഷെയിൻ നിഗമിനെ ചുറ്റിപറ്റി വിവാദങ്ങൾ ആണ് ഇപ്പോൾ സോഷ്യൽ മീഡിയയിൽ ചർച്ച ചെയ്യപ്പെടുന്നത് എങ്കിലും പ്രശ്നങ്ങൾ എല്ലാം വേഗം തന്നെ തീർന്നു ഷെയിൻ നിഗമിനെ വീണ്ടും വെള്ളിത്തിരയിൽ ഉടനെ തന്നെ കാണാൻ സാധിക്കും എന്ന പ്രതീക്ഷയിൽ ആണ് ആരാധകരും സിനിമാ പ്രേമികളും. നിർമ്മാണത്തിൽ ഇരിക്കുന്ന വെയിൽ, കുർബാനി, ഉല്ലാസം എന്നീ ചിത്രങ്ങൾ കൂടാതെ വലിയ പെരുന്നാൾ എന്ന ഷെയിൻ നിഗം ചിത്രം റിലീസിന് തയ്യാറെടുക്കുകയാണ്‌. ഇതിനു പുറമെ ഇടി, മോഹൻലാൽ എന്നീ ചിത്രങ്ങൾ സംവിധാനം ചെയ്ത സാജിദ് യഹിയ ഒരുക്കുന്ന പുതിയ ചിത്രമായ ഖല്ബിലും ഷെയിൻ നിഗം ആണ് നായകൻ.

ഇപ്പോൾ ലഭിക്കുന്ന റിപ്പോർട്ടുകൾ പറയുന്നത് ഈ ചിത്രത്തിൽ ഷെയിൻ നിഗം ഒരു ഗാനവും ആലപിക്കുന്നുണ്ട് എന്നാണ്. സംഗീതം വളരെയധികം ഇഷ്ട്ടമുള്ള ഷെയിൻ നിഗമിന്റെ കുട്ടികാലത്തെ ആഗ്രഹം ഒരു ഗായകൻ ആവണം എന്നായിരുന്നു. അമൃത ചാനെൽ നടത്തിയ സൂപ്പർ ഹിറ്റ് റിയാലിറ്റി ഷോ ആയ സൂപ്പർ സ്റ്റാർ ജൂനിയറിൽ ഓഡിഷന് പോയിട്ടുള്ള താരവുമാണ് ഷെയിൻ നിഗം. എന്നാൽ അന്ന് അദ്ദേഹത്തിന് അവിടെ സെലക്ഷൻ കിട്ടിയില്ല. കുഞ്ഞു ഷെയിൻ നിഗം അന്ന് ഓഡിഷന് പങ്കെടുക്കുന്ന വീഡിയോ സോഷ്യൽ മീഡിയയിൽ വൈറൽ ആണ്. ഇപ്പോൾ ഖൽബ് എന്ന സിനിമയിൽ പാടുക കൂടി ചെയ്യുന്നതോടെ വർഷങ്ങൾ ആയുള്ള ഷെയിൻ നിഗമിന്റെ മോഹമാണ് സാക്ഷാത്ക്കരിക്കപ്പെടുന്നത്. ഈ ചിത്രത്തിന് വേണ്ടി ഷെയിൻ പാടിയ ഗാനം അധികം വൈകാതെ പുറത്തു വിടും എന്നാണ് പ്രതീക്ഷിക്കുന്നത്. ഖൽബിൽ നിന്ന് ചില കാര്യങ്ങൾ പറയാൻ താൻ വരുന്നു എന്നും ഒരു ചെറിയ സർപ്രൈസ് ഉണ്ടെന്നും പറഞ്ഞു ഷെയിൻ നിഗം തന്നെയാണ് താൻ പാടുന്നു എന്ന സൂചന നൽകി ഒരു വീഡിയോ പുറത്തു വിട്ടിരിക്കുന്നത്.