പുതിയ ചിത്രം പൈങ്കിളിയിൽ ആർട്ടിസ്റ്റായി ഷൈൻ നിഗം എത്തുന്നു..

യുവ അഭിനേതാക്കളിൽ ഏറെ ശ്രദ്ധേയനായ അഭിനേതാവ് എന്ന് തന്നെ ഷൈൻ നിഗത്തെ വിളിക്കാം. ബാലതാരമായി ടിവി സീരിയലുകളിലൂടെ പ്രേക്ഷകർക്കു മുൻപിൽ എത്തിയ ഷൈൻ നിഗം പിന്നീട് കിസ്മത്ത് എന്ന ചിത്രത്തിലൂടെ നായകനായി അരങ്ങേറുകയായിരുന്നു. സാമൂഹിക പ്രാധാന്യമുള്ള വിഷയം പറഞ്ഞ ചിത്രം വളരെയേറെ ചർച്ചയായി മാറിയപ്പോൾ ചിത്രത്തിലെ ഷൈനിന്റെ പ്രകടനവും ശ്രദ്ധയാകർഷിച്ചു. പിന്നീട് കഴിഞ്ഞ വർഷങ്ങളിൽ മികച്ച ചിത്രങ്ങളുമായി ഷൈൻ വീണ്ടും പ്രേക്ഷകർക്കു മുൻപിൽ എത്തി. സൗബിൻ ഷാഹിർ സംവിധാനം ചെയ്ത പറവയിൽ ദുൽഖർ സൽമാനോടൊപ്പം എത്തി ഷൈൻ മികച്ച പ്രകടനം കാഴ്ചവച്ചു. പിന്നീട് നായകനായി എത്തിയ ഈട തുടങ്ങിയ ചിത്രങ്ങൾ മികച്ച നിരൂപകപ്രശംസയും വിജയവും നേടി. ദിലീഷ് പോത്തനും നസ്രിയയും നിർമ്മിക്കുന്ന കുമ്പളങ്ങി നൈറ്റ്സ് എന്ന ചിത്രത്തിന്റെ പ്രഖ്യാപനം കഴിഞ്ഞ ദിവസങ്ങളിലാണ് ഉണ്ടായത്. ഇപ്പോഴിതാ ഷൈനിന്റെ പുതിയ ചിത്രത്തിൻറെ വിവരങ്ങൾകൂടി പുറത്ത് വരികയാണ്.

പൈങ്കിളി എന്ന് പേരിട്ടിരിക്കുന്ന പുതിയ ചിത്രം റൊമാൻറിക് – കോമഡി ചിത്രമായാണ് ഒരുക്കുന്നത്. ചിത്രത്തിൽ ഒരു നൃത്ത കലാകാരന്റെ വേഷത്തിലാണ് ഷൈൻ നിഗം എത്തുക. ചിത്രത്തിൽ ഷൈനിനോടൊപ്പം യുവതാരങ്ങൾ അണിനിരക്കും. ചിത്രത്തിനായി ഷൈൻ നിഗം വലിയ മേക്കോവർ തന്നെ നടത്തും. ചിത്രത്തിനായി ഭാരം വർദ്ധിപ്പിച്ച പുതിയ ഒരു ഷൈൻ നിഗത്തെ ആയിരിക്കും പ്രേക്ഷകർക്ക് ചിത്രത്തിലൂടെ കാണാനാവുക. ചിത്രത്തിനായി ഷൈൻ നൃത്തവും അഭ്യസിക്കുന്നുണ്ട്. നവാഗതാനായ ദേവൻ സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് ഈ വർഷം അവസാനത്തോടെ ആരംഭിക്കും. അടുത്ത വർഷം ആദ്യത്തോടെയായിരിക്കും ചിത്രം തീയേറ്ററുകളിൽ എത്തുക.