ഷെയിൻ നിഗം നിർമ്മാതാവാകുന്നു; ഒരുങ്ങുന്നത് രണ്ടു ചിത്രങ്ങൾ

മലയാള സിനിമയിലെ പ്രമുഖ യുവ താരങ്ങളിൽ ഒരാളാണ് ഷെയിൻ നിഗം. അടുത്തിടെ ഷെയിൻ നിഗമമായി ബന്ധപ്പെട്ടു ഉണ്ടായ ചില വിവാദങ്ങൾ മലയാള സിനിമയെ പിടിച്ചൊന്നു കുലുക്കി എങ്കിലും പ്രതിഭാധനനായ ഈ യുവ താരത്തിന് കുലുക്കമില്ല. കിസ്മത് മുതൽ ഇങ്ങോട്ടു, പറവ, ഈട, കുമ്പളങ്ങി നൈറ്റ്സ്, ഇഷ്‌ക്, ഓള് തുടങ്ങിയ ചിത്രങ്ങളിലൂടെ എല്ലാം പ്രേക്ഷകരുടെ ശ്രദ്ധ പിടിച്ചു പറ്റിയ ഈ നടന്റെ വലിയ പെരുന്നാൾ എന്ന ചിത്രം ഈ ക്രിസ്മസിന് റിലീസ് ചെയ്യാൻ പോവുകയാണ്. വിവാദങ്ങൾ അവസാനിച്ച ശേഷം വെയിൽ, കുർബാനി, ഉല്ലാസം, ഖൽബ് തുടങ്ങിയ ഷെയിൻ നിഗം ചിത്രങ്ങളും പ്രേക്ഷകരുടെ മുന്നിൽ എത്തും എന്നാണ് പ്രതീക്ഷിക്കപ്പെടുന്നത്. ഇപ്പോഴിതാ രണ്ടു ചിത്രം നിർമ്മിക്കാനും തനിക്കു ആഗ്രഹം ഉണ്ടെന്നു പറയുകയാണ് ഷെയിൻ നിഗം.

ഓൺലുക്കേഴ്സ് മീഡിയയോട് മനസ്സ് തുറക്കവേ ആണ് ഷെയിൻ നിഗം തന്റെ ഈ ആഗ്രഹം വെളിപ്പെടുത്തിയത്. മലയാള സിനിമയിൽ വളരെയധികം അനുഭവ പരിചയമുള്ള രണ്ടു നവാഗത സംവിധായകർ ഒരുക്കാൻ പോകുന്ന രണ്ടു ചിത്രങ്ങൾ ആയിരിക്കും താൻ നിർമ്മിക്കുക എന്ന് പറഞ്ഞ ഷെയിൻ ആ ചിത്രങ്ങളുടെ പേരുകളും വെളിപ്പെടുത്തി. ഒരു ചിത്രത്തിന്റെ പേര് സിംഗിൾ എന്നാണെങ്കിൽ മറ്റേ ചിത്രത്തിന്റെ പേര് സാരമണി കോട്ട എന്നാണ്. ഈ ചിത്രങ്ങളെ കുറിച്ചുള്ള കൂടുതൽ വിവരങ്ങൾ അധികം വൈകാതെ തന്നെ പുറത്തു വിടും എന്നും ഷെയിൻ നിഗം പറയുന്നു. ഏതായാലും നിർമ്മാതാവായും മലയാള സിനിമയിൽ തന്റെ സ്ഥാനം ഉറപ്പിക്കാൻ ഒരുങ്ങുകയാണ് ഈ യുവ താരം. മുകളിൽ പറഞ്ഞ രണ്ടു ചിത്രങ്ങളിൽ ഷെയിൻ നിഗം തന്നെയാണോ നായകനായി എത്തുക എന്നത് അദ്ദേഹം വെളിപ്പെടുത്തിയിട്ടില്ല.