ഷെയ്ൻ നിഗം നായകനായ പ്രിയദർശൻ ചിത്രം; കൊറോണ പേപ്പേഴ്സ് ആരംഭിച്ചു

മലയാളത്തിന്റെ മാസ്റ്റർ ഡയറക്ടർ പ്രിയദർശൻ സംവിധാനം ചെയ്യുന്ന ഏറ്റവും പുതിയ ചിത്രമാണ് കൊറോണ പേപ്പേഴ്സ്. ഒരു ത്രില്ലർ ചിത്രമായി ഒരുക്കുന്ന കൊറോണ പേപ്പേഴ്‌സിൽ യുവ താരം ഷെയ്ൻ നിഗമാണ് നായകൻ. പ്രിയദർശൻ തന്നെ തിരക്കഥയും രചിച്ച ഈ ചിത്രം ഫോര്‍ ഫ്രെയിംസിന്റെ ബാനറിൽ പ്രിയദർശൻ തന്നെയാണ് നിർമ്മിക്കുന്നതും. ഈ ബാനറിൽ അദ്ദേഹം നിർമ്മിക്കുന്ന ആദ്യത്തെ ചിത്രം കൂടിയാണിത്. ഇന്ന് നടന്ന പൂജ ചടങ്ങുകളോടെ കൊറോണ പേപ്പേഴ്‌സിന്റെ ചിത്രീകരണം കൊച്ചിയിൽ ആരംഭിച്ചു. ന്നാ താൻ കേസ് കൊട് എന്ന കുഞ്ചാക്കോ ബോബൻ ചിത്രത്തിലൂടെ ശ്രദ്ധ നേടിയ ഗായത്രി ശങ്കറാണ് ഈ ചിത്രത്തിലെ നായികാ വേഷം ചെയ്യുന്നത്. ഷെയ്ൻ നിഗം, ഗായത്രി ശങ്കർ എന്നിവരെ കൂടാതെ ഷൈൻ ടോം ചാക്കോ, സിദ്ദിഖ്, കുഞ്ഞികൃഷ്‍ണൻ, മണിയൻ പിള്ള രാജു, ജെയ്സ് ജോസ് തുടങ്ങിയവരാണ് ഈ ചിത്രത്തിലെ മറ്റ് പ്രധാന വേഷങ്ങൾ ചെയ്യുന്നത്.

എം എസ് അയ്യപ്പൻ നായർ എഡിറ്റിംഗ് നിർവഹിക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് ദിവാകർ എസ് മണിയാണ്. മനു ജഗത് കലാസംവിധാനം നിർവഹിക്കുന്ന ഈ ചിത്രത്തിന്റെ എക്സിക്യൂട്ടീവ് പ്രൊഡ്യൂസർ എൻ എം ബാദുഷയാണ്. ഇത് കൂടാതെ ഇനി വരാനുള്ള ഷെയ്ൻ നിഗം ചിത്രമാണ് ബെർമുഡ. ടി കെ രാജീവ് കുമാർ സംവിധാനം ചെയ്ത ബെർമുഡ നവംബറിലാണ് റിലീസ് ചെയ്യാൻ പോകുന്നത്. നവാഗതനായ കൃഷ്‌ണദാസ് പങ്കിയുടെ രചനയില്‍ ഒരുങ്ങിയ ഈ ചിത്രത്തിൽ ഷെയ്ൻ നിഗമിനൊപ്പം വിനയ് ഫോർട്ടും പ്രധാന വേഷം ചെയ്യുന്നു. ഇന്ദുഗോപനെന്ന കഥാപാത്രമായി ഷെയ്ൻ നിഗമഭിനയിച്ച ഈ ചിത്രത്തിൽ സബ് ഇന്‍സ്പെക്ടര്‍ ജോഷ്വയായാണ് വിനയ് ഫോർട്ട് എത്തുന്നത്.