50 കോടി ക്ലബിൽ ആർ ഡി എക്സ്; ഇത് സെൻസേഷണൽ വിജയം

മലയാളത്തിലെ 50 കോടി ക്ലബിലെത്തിയ ചിത്രങ്ങളുടെ ലിസ്റ്റിൽ ഇടം പിടിച്ച് ആർ ഡി എക്സ്. റിലീസ് ചെയ്ത് 9 ദിവസങ്ങൾ കൊണ്ടാണ് ആർഡിഎക്സ് ഈ നേട്ടം സ്വന്തമാക്കിയത്. ഓഗസ്റ്റ് 25 ന് റിലീസ് ചെയ്ത ഈ ചിത്രം കേരളത്തിൽ നിന്ന് മാത്രം നേടിയത് ഏകദേശം 30 കോടിയോളം രൂപയുടെ ഗ്രോസ് കളക്ഷനാണ്. വിദേശ മാർക്കറ്റിൽ നിന്ന് 20 കോടി ഗ്രോസിലേക്കു കുതിച്ചു കൊണ്ടിരിക്കുന്ന ഈ ചിത്രം റസ്റ്റ് ഓഫ് ഇന്ത്യ മാർക്കറ്റിൽ നിന്നും ഏകദേശം 3 കോടി കളക്ഷൻ മാർക്ക് പിന്നിടുകയാണ്. കേരളത്തിൽ സെൻസേഷണൽ വിജയം നേടുന്ന ഈ ചിത്രം വിദേശത്തും അതിഗംഭീര ബോക്സ് ഓഫീസ് പ്രകടനമാണ് കാഴ്ചവെച്ചു കൊണ്ടിരിക്കുന്നത്. മലയാളത്തിൽ നിന്നും 50 കോടി ക്ലബിൽ ഇടം പിടിച്ച പതിനെട്ടാമത്തെ ചിത്രമാണ് ആർഡിഎക്സ്.

ദൃശ്യം, പ്രേമം, ഒപ്പം, പുലി മുരുകൻ, എന്ന് നിന്റെ മൊയ്‌ദീൻ, ടു കൺഡ്രീസ്, കായംകുളം കൊച്ചുണ്ണി, ഒടിയൻ, ഞാൻ പ്രകാശൻ, ലൂസിഫർ, കുറുപ്പ്, ഹൃദയം, ഭീഷ്മ പർവ്വം, ജനഗണമന, മാളികപ്പുറം, രോമാഞ്ചം, 2018 എന്നിവയാണ് ഇതിന് മുൻപ് 50 കോടി ക്ലബിൽ ഇടം പിടിച്ച മലയാള ചിത്രങ്ങൾ. ഷെയ്ൻ നിഗം, ആന്റണി വർഗീസ്, നീരജ് മാധവ് എന്നിവർ നായകന്മാരായി എത്തിയ ആർഡിഎക്സ് സംവിധാനം ചെയ്തത് നവാഗതനായ നഹാസ് ഹിദായത്തും, രചിച്ചത് ഷബാസ്, ആദർശ് എന്നിവരും ചേർന്നാണ്. വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ നിർമ്മിച്ച ഈ ആക്ഷൻ ത്രില്ലറിന് സംഗീതമൊരുക്കിയത് സാം സി എസും, ആക്ഷൻ ഒരുക്കിയത് അൻപ്- അറിവ് ടീമുമാണ്.