എലോൺ 26 മുതൽ; ഹാട്രിക് ഹിറ്റടിക്കുമോ സംവിധായകൻ ഷാജി കൈലാസ്?

മലയാളത്തിന്റെ മഹാനടൻ മോഹൻലാലിനെ നായകനാക്കി സൂപ്പർ ഹിറ്റ് സംവിധായകൻ ഷാജി കൈലാസ് ഒരുക്കിയ ചിത്രമാണ് എലോൺ. കോവിഡ് കാലഘട്ടത്തിന്റെ പശ്‌ചാത്തലത്തിൽ ഒരുക്കിയ ഈ പരീക്ഷണ ചിത്രത്തിന്റെ ഹൈലൈറ്റ് ഇതിൽ മോഹൻലാൽ മാത്രമാണ് അഭിനയിച്ചിരിക്കുന്നത് എന്നതാണ്. ജനുവരി 26 ന് ഈ ചിത്രം പ്രേക്ഷകരുടെ മുന്നിലേക്കെത്തുമ്പോൾ, ഏവരും ചോദിക്കുന്നത് ഇതിലൂടെ ഷാജി കൈലാസ് ഹാട്രിക്ക് വിജയം നേടുമോ എന്ന് കൂടിയാണ്. ഒരു വലിയ ഇടവേളക്ക് ശേഷമാണ് കഴിഞ്ഞ വർഷം ഷാജി കൈലാസ് തിരിച്ചു വരവ് നടത്തിയത്. പൃഥ്വിരാജ് നായകനായ സൂപ്പർഹിറ്റ് ചിത്രം കടുവയിലൂടെയാണ് അദ്ദേഹം തിരിച്ചു വന്നത്. അതിനു ശേഷം പൃഥ്വിരാജ് തന്നെ നായകനായ കാപ്പ എന്ന ചിത്രവും ഷാജി കൈലാസിന് വിജയം സമ്മാനിച്ചു. ഇപ്പോഴിതാ ഒരു കഥാപാത്രത്തെ മാത്രം വെച്ച് വളരെ ചെറിയ ബഡ്ജറ്റിലൊരുക്കിയ എലോൺ കൂടി വിജയം നേടിയാൽ ഹാട്രിക് വിജയമാണ് സംവിധായകനെന്ന നിലയിൽ ഷാജി കൈലാസിനെ കാത്തിരിക്കുന്നത്.

വെറും പതിനേഴ് ദിവസം കൊണ്ടാണ് എലോൺ അദ്ദേഹം പൂർത്തിയാക്കിയത്. ഇതിന്റെ ട്രൈലെർ മികച്ച പ്രേക്ഷക ശ്രദ്ധയാണ് നേടിയെടുത്തത്. അഭിനയിച്ചിരിക്കുന്നത് മോഹൻലാൽ മാത്രമാണെങ്കിലും, ഈ ചിത്രത്തിൽ ശബ്ദ സാന്നിധ്യമായി പൃഥ്വിരാജ് സുകുമാരൻ, മഞ്ജു വാര്യർ, മല്ലിക സുകുമാരൻ, സീനത്ത്, രഞ്ജി പണിക്കർ, സിദ്ദിഖ്, നന്ദു എന്നിവരും ഉണ്ട്. രാജേഷ് ജയരാമൻ തിരക്കഥ രചിച്ച ഈ ചിത്രം നിർമ്മിച്ചിരിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ്. ടീം ഫോർ മ്യൂസിക്സ് സംഗീതമൊരുക്കിയ എലോൺ എഡിറ്റ് ചെയ്തിരിക്കുന്നത് ഡോൺ മാക്‌സും ഇതിന് ക്യാമറ ചലിപ്പിച്ചിരിക്കുന്നത് അഭിനന്ദം രാമാനുജൻ, പ്രമോദ് കെ പിള്ളൈ എന്നിവരും ചേർന്നാണ്.