പ്രേക്ഷകരറിയാതെ പോയ ഒരു പിന്നാമ്പുറ കഥ; പ്രേമത്തിൽ ഈ നടിയും അഭിനയിച്ചിരുന്നു, പക്ഷെ

അഞ്ചു വർഷം മുൻപോട്ടു മലയാളത്തിൽ റിലീസ് ചെയ്ത പ്രേമം എന്ന ചിത്രം ബ്ലോക്ക്ബസ്റ്റർ വിജയമാണ് നേടിയത്. നിവിൻ പോളിയെ നായകനാക്കി അൽഫോൻസ് പുത്രൻ സംവിധാനം ചെയ്ത ഈ ചിത്രം കേരളത്തിൽ മാത്രമല്ല കേരളത്തിന് പുറത്തും തരംഗമായി. നിവിൻ പോളിക്കു പുറമെ സായി പല്ലവി, അനുപമ പരമേശ്വരൻ, മഡോണ സെബാസ്റ്റിയൻ, വിനയ് ഫോർട്ട്, സൗബിൻ ഷാഹിർ, സിജു വിൽസൺ, ഷറഫുദീൻ, കൃഷ്ണ ശങ്കർ, ശബരീഷ് വർമ്മ തുടങ്ങിയ ഒട്ടേറെ നടീനടന്മാർക്കു കരിയറിൽ ബ്രേക്ക് ആയ സിനിമയാണ് പ്രേമം. ഇപ്പോഴിതാ പ്രേമം സിനിമയ്ക്കു പിന്നിലെ പ്രേക്ഷകരറിയാത്ത ഒരു കഥ വെളിപ്പെടുത്തുകയാണ് നടൻ ശബരീഷ് വർമ്മ. പ്രശസ്ത നടിയായ സേതുലക്ഷ്മിയും പ്രേമത്തില്‍ പ്രധാന വേഷത്തില്‍ അഭിനയിച്ചിരുന്നു എന്നാണ് ശബരീഷ് വെളിപ്പെടുത്തുന്നത്.

കോളജില്‍ ഒരു പ്രധാന കഥാപാത്രത്തെയാണ് സേതുലക്ഷ്മി ചേച്ചി അവതരിപ്പിച്ചത് എന്നും എന്നാൽ അത് അവസാനം എഡിറ്റ് ചെയ്തു കളയേണ്ടി വന്നുവെന്നു ശബരീഷ് പറയുന്നു. ഇതൊരു തിക്താനുഭവമായി പല സ്ഥലത്ത് വച്ചും ചേച്ചി തന്റെയടുത്തു പറയാറുണ്ട് എന്നും ശബരീഷ് പറയുന്നു. സേതുലക്ഷ്മി ചേച്ചിയുടെ പ്രകടനവുമായി ആ ഭാഗം എഡിറ്റ് ചെയ്തു കളഞ്ഞതിനു ബന്ധമൊന്നുമില്ല എന്നും തിരക്കഥ ഡൈവേര്‍ട്ട് ആയി പോകുന്നു എന്ന കാരണത്താലാണ് ആ ഭാഗം ഒഴിവാക്കേണ്ടി വന്നതെന്നും ശബരീഷ് വിശദീകരിച്ചു. പ്രേമത്തില്‍ അഭിനയിച്ചിട്ടും പുറത്താരും അറിയാണ്ട് പോയ ഒരാളാണ് സേതു ലക്ഷ്മി ചേച്ചി എന്നും ഇപ്പോഴും തമാശയായി ഇനി നിങ്ങൾ വിളിച്ചാൽ ഞാൻ വരില്ല എന്ന് ചേച്ചി പറയുമെന്നും ശബരീഷ് പറയുന്നു. നവാഗതനായ ജെനിത് കാച്ചപ്പിള്ളി സംവിധാനം ചെയ്യുന്ന മറിയം വന്നു വിളക്കൂതി എന്ന സിനിമയില്‍ ശബരീഷും സേതുലക്ഷ്മിയും ഒരുമിച്ചഭിനയിച്ചിട്ടുണ്ട്. സിജു വിൽസൺ, കൃഷ്ണ ശങ്കർ, അൽത്താഫ് സലിം എന്നിവരും അഭിനയിക്കുന്ന ഈ ചിത്രം ഈ വരുന്ന വെള്ളിയാഴ്ച റിലീസ് ചെയ്യും.