ആ സൂപ്പർ ഹിറ്റ് ചിത്രത്തിന്റെ രണ്ടാം ഭാഗം വരുന്നു..!

മലയാളത്തിലെ പ്രശസ്ത സംവിധായകൻ ലാൽ ജോസ് ഒരുക്കി 2014 ഇൽ റിലീസ് ചെയ്ത ചിത്രമാണ് വിക്രമാദിത്യൻ. ഡോക്ടർ ഇക്ബാൽ കുറ്റിപ്പുറം രചിച്ച ഈ ചിത്രത്തിൽ ദുൽഖർ സൽമാൻ, ഉണ്ണി മുകുന്ദൻ, നമിത പ്രമോദ്, അനൂപ് മേനോൻ എന്നിവരാണ് പ്രധാന വേഷങ്ങൾ ചെയ്തത്. യുവ താരം നിവിൻ പോളി ഈ ചിത്രത്തിൽ അതിഥി വേഷത്തിലും അഭിനയിച്ചു. ഇപ്പോഴിതാ ഈ ചിത്രത്തിന്റെ രണ്ടാം ഭാഗം ആലോചിക്കുകയാണ് തങ്ങളെന്ന് വെളിപ്പെടുത്തിയിരിക്കുകയാണ് ലാൽ ജോസ്. എന്നാൽ താൻ ഈ ചിത്രത്തിന്റെ കഥയോ കാര്യങ്ങളോ ദുൽഖർ സൽമാനോട് പറഞ്ഞിട്ടില്ല എന്നും, അത് പറഞ്ഞു ദുൽഖർ സമ്മതം മൂളിയാൽ മാത്രമേ ഈ ചിത്രം നടക്കു എന്നും ലാൽ ജോസ് പറഞ്ഞു. ദുൽഖർ സൽമാൻ, ഉണ്ണി മുകുന്ദൻ, നമിത പ്രമോദ് എന്നിവർ ഈ രണ്ടാം ഭാഗത്തിലും ഉണ്ടാകുമെന്നും ഇവർക്കൊപ്പം മറ്റൊരു പ്രമുഖ മലയാള താരം കൂടി ഈ ചിത്രത്തിന്റെ ഭാഗം ആവുമെന്നും ലാൽ ജോസ് പറഞ്ഞു.

വിക്രമാദിത്യൻ 2 ഉണ്ടായേക്കാം എന്ന പ്രഖ്യാപനം ദുൽഖർ ആരാധകരെ ഏറെ ആവേശം കൊള്ളിച്ചിട്ടുണ്ട്. ദുൽഖറിന്റെ കരിയറിലെ മികച്ച വേഷങ്ങളിൽ ഒന്നായിരുന്നു വിക്രമാദിത്യൻ എന്ന ചിത്രത്തിലേതു. ലാൽ ജോസ് ഒരുക്കിയ മ്യാവു എന്ന ചിത്രം ഈ ക്രിസ്മസിന് ആണ് തീയേറ്ററുകളിൽ എത്തിയത്. സൗബിൻ ഷാഹിർ, മമത മോഹൻദാസ്, ഹരിശ്രീ യൂസഫ്, സലിം കുമാർ എന്നിവർ പ്രധാന വേഷങ്ങൾ ചെയ്ത ഈ ചിത്രം രചിച്ചിരിക്കുന്നതും ഡോക്ടർ ഇക്ബാൽ കുറ്റിപ്പുറം ആണ്. മ്യാവു ഇപ്പോൾ തീയേറ്ററുകളിൽ പ്രദർശനം തുടരുകയാണ്. പൃഥ്വിരാജ് നായകനായ ഒരു ചിത്രവും ലാൽ ജോസ് പ്ലാൻ ചെയ്യുന്നുണ്ട് എന്ന് വാർത്തകൾ വന്നിരുന്നു.